កំពង់ស្ពឺ: យោងតាមផេក អគ្គស្នងការដ្ឋាននគរបាលជាតិ បានឲ្យដឹងថា មានករណីគ្រោះថ្នាក់ចរាចរណ៍ ១ករណីដោយសារបើកម៉ូតូចូលជង្ហុកហើយបានធ្លាក់មនុស្សម្នាក់ទៅលើថ្នល់ ត្រូវបានរថយន្តមកពីក្រោយកិនស្លាប់ (បើកបរស្របទិសគ្នាពីកើតទៅលិច) ។
ហេតុការណ៍នេះ កើតឡើងនៅលើផ្លូវក្រាលកៅស៊ូ នៅចំណុចភូមិសេរីភ័យ ឃុំពោធិ៍អង្គ្រង ស្រុកបសេដ្ឋ ខេត្តកំពង់ស្ពឺ នៅថ្ងៃព្រហស្បតិ៍ ៧កើត ខែចេត្រ ឆ្នាំឆ្លូវ ព.ស.២៥៦៥ ត្រូវនឹងថ្ងៃទី៧ ខែ មេសា ឆ្នាំ២០២២ វេលាម៉ោង៧និង៣០នាទី ។
នគរបាលចរាចរណ៍ នៃអធិការដ្ឋាននគរបាលស្រុក បានឲ្យដឹងថា មុនពេលកើតហេតុ ម៉ូតូម៉ាកហុងដា C125 ពណ៌ខ្មៅ ស៊េរីឆ្នាំ២០១០ ពាក់ស្លាកលេខភ្នំពេញ 1AG-6297 បើកបរដោយឈ្មោះ ឃីម លីស្សា ភេទស្រី អាយុ១២ឆ្នាំ រស់នៅភូមិសេរីភ័យ ឃុំពោធិ៍អង្គ្រង ស្រុកបសេដ្ឋ ខេត្តកំពង់ស្ពឺ និងអ្នករួមដំណើរ១នាក់ទៀតឈ្មោះ យីម សុភ័ស្ស ភេទប្រុស អាយុ៩ឆ្នាំ រស់នៅភូមិ-ឃុំខាងលើ ។
សមត្ថកិច្ចបន្តថា ពេលមកដល់កន្លែងហេតុ បានជ្រុលចង្កូតចូលជង្ហុកលើថ្នល់ ហើយធ្លាក់មនុស្សម្នាក់ពីលើម៉ូតូ ស្របពេលនោះមានរថយន្ត០១គ្រឿងម៉ាកខេនធើពណ៌ខៀវ ពាក់ស្លាកលេខ PP-2734 ធ្វើដំណើរមកពីគ្រោយជាន់ហ្វ្រាំងមិនទាន់ជ្រុលកិនស្លាប់នៅកន្លែងកើតហេតុ ។
បច្ចុប្បន្ន មធ្យោបាយទាំងពីរផ្នែក កម្លាំងនគរបាលជំនាញបានយកមករក្សាទុក នៅអធិការដ្ឋាននគរបាលស្រុកបរសេដ្ឋ ដើម្បីរង់ចាំការដោះស្រាយតាមនីតិវិធី ៕
មតិយោបល់