ភ្នំពេញៈ នៅវេលាម៉ោង៣ និង០០នាទីរសៀលថ្ងៃទី០៨ ខែមេសា ឆ្នាំ២០២២ មានករណីគ្រោះថ្នាក់ចរាចរណ៍ មួយបានកើតឡើង រថយន្តមួយគ្រឿងម៉ាក Range Rover បុកម៉ូតូម៉ាក DUKE មួយគ្រឿង ពាក់ស្លាកលេខភ្នំពេញ 1CM-9699 បណ្ដាលឲ្យបុរសម្នាក់ ជាជនបរទេស រងរបួសធ្ងន់ សង្ស័យបាក់ជើង ត្រូវដឹកបញ្ជូនទៅកាន់មន្ទីរពេទ្យភ្លាមៗ ដើម្បីជួយសង្រ្គោះបន្ទាន់ ទីតាំងកន្លែងកើតហេតុ ស្ថិតតាមបណ្ដោយផ្លូវ៣៦០ កែងនឹងផ្លូវ១១៣ ក្នុងសង្កាត់បឹងកេងកងទី៣ ខណ្ឌបឹងកេងកង រាជធានីភ្នំពេញ ។

ហេតុការណ៍ករណីគ្រោះថ្នាក់ចរាចរណ៍ខាងលើនេះ យោងតាមសេចក្តីរាយការណ៍ ពីក្រុមការងារនៃអង្គភាពសារព័ត៌កមាន Post News យើងខ្ញុំដែលបានចុះទៅដល់ផ្ទាល់ទីតាំងកន្លែងកើតហេតុ បានបញ្ជាក់ប្រាប់ឲ្យដឹងដូច្នេះថា នៅមុនពេលកើតហេតុ គេឃើញ ជនមិនស្គាល់អត្តសញ្ញាណម្នាក់ បើកបររថយន្តមួយគ្រឿងម៉ាក Range Rover មិនចាំស្លាកលេខនោះទេ បើកបរធ្វើដំណើរតាម បណ្តោយផ្លូវ៣៦០ ដល់ចំណុចកើតហេតុ កែងនឹងផ្លូវ១១៣ រថយន្តនេះបានបុកម៉ូតូម៉ាក DUKE មួយគ្រឿង ពាក់ស្លាកលេខភ្នំពេញ 1CM-9699 បណ្តាលឲ្យបុរសម្នាក់មិនស្គាល់អត្តសញ្ញាណ បានរងរបួសធ្ងន់ ត្រូវដឹកបញ្ជូនទៅកាន់មន្ទីរពេទ្យ ដើម្បីជួយសង្រ្គោះបន្ទាន់ ផងដែរ ។

អ្នកឃើញហេតុការណ៍បានបញ្ជាក់ប្រាប់ថា ភាគីខាងម៉ូតូរងគ្រោះជាជនបរទេស ។ ចំណែកឯរថយន្តបង្កហេតុនោះវិញ បន្ទាប់ពីបុករួច បានបើកបរបន្ថែមល្បឿនដើម្បីរត់គេចខ្លួនចេញពីកន្លែងកើតហេតុ ប៉ុន្តែត្រូវបានកម្លាំងសមត្ថកិច្ចធ្វើការដេញតាមស្ទាក់ចាប់ឃាត់ខ្លួន បាន ។

នៅក្រោយពេលកើតហេតុ កម្លាំងសមត្ថកិច្ចនគរបាលជំនាញផ្នែកចរាចរណ៍ នៃអធិការដ្ឋាននគរបាលខណ្ឌបឹងកេងកង បានចុះទៅដល់ ទីតាំងកន្លែងកើតហេតុ ដើម្បីធ្វើការពិនិត្យ និងវាស់វែងយកវត្ថុតាងទៅរក្សាទុកជាបណ្តោះអាសន្ន រង់ចាំភាគីទាំងសងខាងចូលខ្លួនមកដោះស្រាយគ្នានៅពេលក្រោយ ទៅតាមនីតិវិធីផ្លូវច្បាប់ ៕