ហាណូយ៖ ប្រទេសវៀតណាមទទួលបានប្រាក់ចំនួន ២,៩៨៦ពាន់លានដុល្លារអាមេរិកពីការនាំចេញអង្ករ ៦,៧២២លានតោនក្នុងឆ្នាំ ២០១៣ ដោយបានធ្លាក់ចុះ ១៨,៧ភាគរយ បើធៀបនឹងឆ្នាំមុន។ នេះបើយោងតាមស្ថិតិការិយាល័យទូទៅបានបង្ហាញឲ្យដឹងកាលពីថ្ងៃព្រហស្បតិ៍កន្លងទៅ។
តែនៅក្នុងខែធ្នូ វៀតណាមលក់អង្ករបាន ៥០០.០០០តោន ដែលគិតជាប្រាក់មានចំនួន ២៤០លានដុល្លារអាមេរិក ដោយបានធ្លាក់ចុះ ៣,៤៧ភាគរយ។ ទីផ្សារនាំចេញអង្ករដ៏សំខាន់របស់វៀតណាមក្នុងឆ្នាំ ២០១៣ រួមមាន ចិន ម៉ាឡាស៊ី ហ្វីលីពីន សិង្ហបុរី ហុងកុង ឥណ្ឌូនេស៊ី និងប្រទេសមួយចំនួនទៀត។
បើយោងតាមស្ថិតិចុងក្រោយបំផុតរបស់ក្រសួងកសិកម្ម និងអភិវឌ្ឍន៍ជនបទរបស់វៀតណាមបានឲ្យដឹងថា ប្រទេសចិននៅតែជាប្រទេសដែលនាំចូលអង្ករពីវៀតណាមច្រើនជាងក្នុងឆ្នាំ ២០១៣។ នៅក្នុងរយៈពេល ១១ខែដំបូង នៃឆ្នាំ ២០១៣ ចិនបាននាំចូលអង្ករពីវៀតណាមជាង ២លានតោន គិតជាទឹកប្រាក់មានចំនួន ៨៤៩,៣៦លានដុល្លារអាមេរិក ដោយបានកើនឡើង ៦,២២ភាគរយ ស្មើនឹង ៣១ភាគរយនៃប្រាក់ចំណូលពីការលក់អង្ករសរុប។
អគ្គលេខាធិការនៃសមាគមស្បៀងវៀតណាម លោក Huynh Minh Hue បាននិយាយថា ប្រទេសវៀតណាម បានបរាជ័យក្នុងការសម្រេចគោលដៅនាំចេញអង្ករ ៧,៥លានតោនក្នុងឆ្នាំ ២០១៣។
អង្ករដើរតួនាទីដ៏សំខាន់បំផុតក្នុងចំណោមទំនិញកសិកម្មនៅក្នុងប្រទេសវៀតណាមនៅក្នុងលក្ខខណ្ឌនៃសន្ដិសុខស្បៀង ប្រាក់ឈ្នូល នៅតាមជនបទ និងការងារដូចជាប្រាក់ចំណូលនាំចេញ។ វៀតណាមបានក្លាយជាប្រទេសនាំចេញអង្ករកំពូលនៅទូទៅពិភពលោកក្នុងរយៈពេលប៉ុន្មានឆ្នាំចុងក្រោយនេះ៕
មតិយោបល់