ព័ត៌មានជាតិ

ជនសង្ស័យ​ម្នាក់ត្រូវកម្លាំង​សមត្ថកិច្ច​​ឃាត់ខ្លួន ​ពី​បទ​ប្រើ​អំពើ​ហិ​ង្សា​ក្នុង​គ្រួសារ ​ដោយ​យក​កាំបិត​គំរាម​​កាប់ប្រពន្ធ

ពោធិ៍សាត់:​ យោងតាមផេក អគ្គស្នងការដ្ឋាននគរបាលជាតិ បានឲ្យដឹងថា កាលពី​ថ្ងៃ​អង្គារ​​ទី​១២​ ខែមេសា​ ឆ្នាំ​២០២២​ វេលា​ម៉ោង​៦​និង​១៥​នាទី​ល្ងាច​ ជនសង្ស័យ​ម្នាក់​ត្រូវ​សមត្ថកិច្ច​នគរបាល​ឃាត់ខ្លួន ​ពី​បទ​ប្រើ​អំពើ​ហិ​ង្សា​ក្នុង​គ្រួសារ ​ដោយ​បាន​ជេរ​ប្រមាថ​ប្រពន្ធ​ និង​យក​កាំបិតចែត​ មក​គំរាម​រក​កាប់សម្លាប់ ​ទៅ​លើ​ប្រពន្ធ​របស់​ខ្លួន​ នៅ​ចំណុច​ផ្ទះ​ជន​រង​គ្រោះ ​ស្ថិត​នៅ​ភូមិ​តា​សាស់​ ឃុំ​ផ្ទះ​រុង​ ស្រុក​តា​លោ​សែន​ជ័យ​ ខេត្តពោធិ៍សាត់ ​។​

​យោងតាម​របាយការណ៍ ​របស់​អធិការដ្ឋាន​នគរបាល​ ស្រុក​តា​លោ​សែន​ជ័យ​ បាន​ឲ្យ​ដឹង​ថា​ ករណី​នេះ​សមត្ថកិច្ច​នគរបាល ​បាន​ទទួល​ពាក្យបណ្ដឹង​ពី​ឈ្មោះ​ កេ​ន​ សា​រ៉ា​ន់​ ភេទ​ស្រី​ អាយុ ​៤០ ​ឆ្នាំ ​មុខរបរ ​(​កសិករ​) ​រស់នៅ​ភូមិ​កើតហេតុ​ខាងលើ​ បាន​ប្តឹង​ទៅ​លើ​ប្តី​របស់​ខ្លួន​ឈ្មោះ​ ឡុ​ញ​ ទឿ​ម​ ភេទ​ប្រុស ​អាយុ ​៤១​​ ​ឆ្នាំ​ មុខរបរ ​(​កសិករ​) ​រស់នៅ​ជាមួយ​គ្នា​ ដែល​ជនសង្ស័យ​ជា​ប្ដី ​បាន​ជេរ​ប្រមាថ​និង​យក​កាំបិតចែត​ មក​គំរាម​រក​កាប់សម្លាប់​ទៅ​លើ​ខ្លួន​ ​កាល​នៅ​ថ្ងៃ​ទី​១២​ ខែមេសា​ ឆ្នាំ​ ២០២២​ វេលា​ម៉ោង​៥​និង​៣៥​ នាទី​ល្ងាច ​។​

ក្រោយ​ពី​ទទួល​ពាក្យបណ្ដឹង​រួច​ សមត្ថកិច្ច​ប៉ុស្តិ៍​នគរបាល​រដ្ឋបាល​ផ្ទះ​រុង​ បាន​សហការ​ជាមួយ​កម្លាំង​អន្តរាគមន៍​ អធិការដ្ឋាន​នគរបាល​ស្រុក​តា​លោ​សែន​ជ័យ​ ដឹកនាំ​ដោយ​ លោក​អនុសេនីយ៍ទោ​ មិត្ត​ ច័ន្ទ​សារី​ នាយ​រង​ប៉ុស្តិ៍​នគរបាល​រដ្ឋ​ផ្ទះ​រុង​ បាន​ចុះ​ទៅ​ដល់​កន្លែង​កើតហេតុ​ ត្រួតពិនិត្យ​និង​ស្រាវជ្រាវ​សួរនាំ ​ឈាន​ដល់​ការ​ឃាត់ខ្លួន​ជនសង្ស័យ​ឈ្មោះ​ ឡុ​ញ​ ទឿ​ម​ និង​ ដកហូត​វត្ថុ​តាង ​(​កាំបិតចែត​១)​ បញ្ជូន​មក​កាន់​ប៉ុស្តិ៍​នគរបាល​រដ្ឋបាល​ផ្ទះ​រុង​ ដើម្បី​សួរនាំ​តាម​នីតិវិធី​។​

​តាមរបាយការណ៍​បាន​ឲ្យ​ដឹង​ទៀត​ថា​ មូលហេតុ​ដែល​ជនសង្ស័យ​ប្រើ​អំពើ​ហិ​ង្សា ​ទៅ​ប្រពន្ធ​របស់​ខ្លួន​ គឺ​ដោយសារ​ស្រវឹងស្រា​ ។​ តាម​បណ្ដឹង​របស់​ជន​រង​គ្រោះជា​ប្រពន្ធ​គឺ​ សូម​ឱ្យ​សមត្ថកិច្ច​ជួយ​ធ្វើការ​អប់រំ​លើក​ទី​១ ​នៅ​ប៉ុស្តិ៍​នគរបាល​រដ្ឋបាល​ផ្ទះ​រុង ​។​ ក្រោយ​ពី​ការ​អប់រំ​ប្រពន្ធ​និង​ក្រុម​គ្រួសារ​សាច់ញាតិ​ បាន​ធ្វើ​លិខិតធានា​យក​ទៅ​ផ្ទះ​វិញ ​៕​

មតិយោបល់