ភ្នំពេញ: យោងតាមផេក អគ្គស្នងការដ្ឋាននគរបាលជាតិ បានឲ្យដឹងថា អគ្គិភ័យឆាបឆេះផ្ទះប្រជាពលរដ្ឋយ៉ាងសន្ធោសន្ធៅអស់ចំនួន ៥ខ្នង និងសម្ភារ:ក្នុងផ្ទះអស់ទាំងស្រុងផងដែរ ។ ហេតុការណ៍នេះបានកើតឡើងនៅវេលាម៉ោង ៩និង៣០នាទីព្រឹក ថ្ងៃទី១៣ ខែមេសា ឆ្នាំ២០២២ ដែលស្ថិតនៅចំណុចផ្ទះលេខ៥៥ ផ្លូវលេខ២៤៧ ភូមិ១០ សង្កាត់បឹងសាឡាង ខណ្ឌទួលគោក រាជធានីភ្នំពេញ ។
លោកវរសេនីយ៍ឯក ព្រហ្ម យ៉ន នាយការិយាល័យ ប្រាប់សារព័ត៌មានឲ្យដឹងថា ក្រោយពីទទួលបានព័ត៌មានថា មានអគ្គិភ័យកំពុងឆាបឆេះផ្ទះប្រជាពលរដ្ឋ ភ្លាមៗនោះ លោកក៏បានបញ្ជាទៅកម្លាំងសមត្ថកិច្ចជំនាញគ្រប់គោលដៅទាំងអស់ក្នុងរាជធានីភ្នំពេញ ឲ្យចេញរថយន្តពន្លត់អគ្គិភ័យជួយអន្តរាគមន៍ផងដែរ ។
ដោយនៅក្នុងរង្វង់ប្រតិបត្តិការអន្តរាគមន៍ជួយសង្គ្រោះនេះ គឺកម្លាំងជំនាញបានប្រើប្រាស់រថយន្តពន្លត់អគ្គិភ័យរបស់ការិយាល័យ ចំនួន ១៩គ្រឿង ប្រើប្រាស់ទឹកអស់ ៥៧ឡាន ស្មើនឹង ២២៨ម៉ែត្រគូប, រថយន្តជំនួយមកពីក្រសួងមហាផ្ទៃ ចំនួន ២គ្រឿង ប្រើប្រាស់ទឹកអស់ ២ឡាន ស្មើនឹង ៨ម៉ែត្រគូប, ក្រុមហ៊ុន OCIC ទីក្រុងកោះពេជ្រ ចំនួន ៣គ្រឿង ប្រើប្រាស់ទឹកអស់ ៣ឡាន ស្មើនឹង ១២ម៉ែត្រ ក្នុងប្រតិបត្តិការបាញ់ឲ្យរលត់ទាំងស្រុង ។
លោកវរសេនីយ៍ឯក បានបញ្ជាក់ថា ចំពោះអគ្គិភ័យខាងលើនេះ បានឆេះបំផ្លាញ ឈើលើថ្មក្រោម ដែលមានទំហំ ៤ម៉ែត្រ x ១៦ម៉ែត្រ និងឆេះផ្ទះឈើលើថ្មក្រោមចំនួន ១ខ្នង និងឆេះរាលដាលដល់ផ្ទះអ្នកជិតខាងចំនួន ៥ខ្នងអស់ទាំងស្រុង ។
យ៉ាងណាមិញ សម្រាប់ប្រតិបត្តិការនេះ គឺសមត្ថកិច្ចជំនាញ បានធ្វើការគ្រប់គ្រងបាននៅវេលាម៉ោង ១១និង១០នាទីព្រឹកថ្ងៃដដែល ។ សម្រាប់គ្រោះអគ្គិភ័យខាងលើនេះ គឺមិនបានបណ្តាលឲ្យមានអ្នកណាម្នាក់រងរបួសឡើង ។ ចំពោះមូលហេតុ ដែលបង្កឲ្យមានគ្រោះអគ្គិភ័យនេះកើតឡើង ដោយសារតែការ ឆ្លងចរន្តអគ្គិសនី ។
ថ្លែងនៅក្នុងឱកាសនោះ លោកវរសេនីយ៍ឯក ព្រហ្ម យ៉ន នាយការិយាល័យ ក៏បានអំពាវនាវដល់បងប្អូនប្រជាពលរដ្ឋទាំងអស់ ត្រូវប្រុងប្រយ័ត្នឲ្យបានខ្ពស់បំផុត មុននឹងធ្វើដំណើរចាកចេញពីលំនៅដ្ឋានទៅស្រុកកំណើត ឬក៏ទៅកាន់តំនប់កម្សាន្តផ្សេងៗ ត្រូវតែធ្វើការបិទចរន្តអគ្គិសនី ទឹក ពិនិត្យមើល ភ្លើងធូប ភ្លើងទៀន ឲ្យបានត្រឹមត្រូវ មុននឹងចាកចេញពីលំនៅដ្ឋាន ។
ក្នុងករណីចាំបាច់ សូមបងប្អូនប្រជាពលរដ្ឋធ្វើការរាយការណ៍ មកកាន់លេខទូរស័ព្ទបន្ទាន់ 666 រឺក៏លេខទូរស័ព្ទក្រុមការងារព័ត៌មាន និងប្រតិកម្មរហ័ស របស់ការិយាល័យនគរបាលបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ តាមរយ:លេខ 097 7 3333 55 ៕
មតិយោបល់