ភ្នំពេញៈ ករណីគ្រោះថ្នាក់ចរាចរណ៍មួយដែលម៉ូតូកង់បីឥណ្ឌា ២គ្រឿង បានបុកគ្នាយ៉ាងពេញទំហឹងរងការខូចខាតទាំងសងខាង។

ហេតុការណ៍ខាងលើ បង្កការភ្ញាក់ផ្អើលកាលពីវេលាម៉ោង ២និង៥០នាទីរសៀលថ្ងៃទី១៩ ខែមេសា ឆ្នាំ២០២២ ទីតាំងកន្លែងកើតហេតុស្ថិតនៅតាមបណ្ដោយផ្លូវជាតិលេខ៤ ក្នុងភូមិអង្គកែវ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ។

តាមប្រភពព័ត៌មាននៅទីតាំងកន្លែងកើតហេតុបានឲ្យដឹងថា មុនដំបូងគេបានឃើញម៉ូតូកង់បីឥណ្ឌាមួយគ្រឿង ពណ៌ស ពាក់ស្លាកលេខ ភ្នំពេញ 1IH-7629 បានធ្វើដំណើរក្នុងទិសដៅពីលិចទៅកើត រហូតមកដល់ចំណុចកើតហេតុ ក៏មានកង់បីឥណ្ឌាមួយគ្រឿងទៀតពណ៌សដូចគ្នា ពាក់ស្លាកលេខ កណ្ដាល 1AB- 5945 ធ្វើដំណើរក្នុងទិសដៅពីកើតទៅលិចរួចបត់ឆ្វេង បណ្ដាលឲ្យជ្រុលបុកគ្នាយ៉ាងពេញទំហឹងរងការខូចខាតទាំងសងខាង

ក្រោយពេលកើតហេតុភាគីទាំងសងខាង បានធ្វើការសម្របសម្រួលគ្នាមួយជំហានសិន បើមិនត្រូវគ្នានឹងទាក់ទងទៅខាងសមត្ថកិច្ច ចុះធ្វើការវាស់វែងយកទៅរក្សាទុកដើម្បីរង់ចាំការដោះស្រាយ៕