-

ករណីគ្រោះថ្នាក់​ចរាចរណ៍​រវាង​ម៉ូតូ​ និង​រថយន្ត​ បណ្តាល​ឲ្យ​បុរស​ម្នាក់​ស្លាប់​ នៅ​ក្រុង​សិរី​សោភ័ណ

បន្ទាយមានជ័យ: យោងតាមផេកអគ្គស្នងការដ្ឋាននគរបាលជាតិបានឲ្យដឹងថា បុរស​ម្នាក់​បាន​បាត់បង់​ជីវិត​ក្រោយ​ពី​ជួប​ឧបទ្ទវហេតុ​គ្រោះ​ថ្នា់​ចរាចរណ៍​ រវាង​ម៉ូតូ​ប៉ះទង្គិច​ជាមួយ​រថយន្ត​​ ហេតុការណ៍​គ្រោះថ្នាក់​ចរាចរណ៍​នោះ​ បាន​កើតឡើង​នៅ​វេលា​ម៉ោង​១២​និង​៣០​នាទី​ ថ្ងៃ​ទី​១៨​ ខែមិថុនា​ ឆ្នាំ​២០២២​ នៅ​លើ​កំណាត់​ផ្លូវជាតិ​លេខ​៦​ ក្រៅ​ទីប្រជុំជន​ ត្រង់​ចំណុច​មុខ​ភោជនីយ​បឹង​ឈូក​ស្ថិត​នៅ​ភូមិ​១​ សង្កាត់​ព្រះ​ពន្លា​ ក្រុង​សិរី​សោភ័ណ​ ខេត្តបន្ទាយមានជ័យ​ ។​

​នគរបាល​ចរាចរណ៍​បាន​ឲ្យ​ដឹង​ថា​ ជន​រង​គ្រោះ​ឈ្មោះ​ យស់​ ហុ​កឡាយ​ ភេទ​ប្រុស​ អាយុ​ ២១​ឆ្នាំ​ នៅ​ភូមិស្រ​ណា​ល​ ឃុំ​ស្រ​ណា​ល​ ស្រុក​ក្រឡាញ់​ ខេត្តសៀមរាប​ បើ​បរ​ម៉ូតូ​ ម៉ាក​ហុងដា​សេ​125​ ពណ៌​ខ្មៅ​ ពាក់​ស្លាក​លេខ​ សៀមរាប​-1AC-9927​ បើកបរ​ក្នុង​ល្បឿន​លឿន​ អត់​ពាក់មួក​សុវត្ថិភាព​ ទិស​ដៅ​ពី​លិចទៅ​កើត​ ។​ លុះ​មក​ដល់​ចំណុច​កើតហេតុ​ វា​ជែង​រថយន្ត​ផ្សេង​ទៀត​ ដែល​ធ្វើ​ដំណើរ​ស្រប​ទិស​គ្នា​ ហើយ​ជ្រុល​ទៅ​បុក​ប៉ះ​ជាមួយ​រថយន្ត​ម៉ាក​ហា​យ​ឡិន​ដឺ​ ពណ៌​បៃតង​ ពាក់​ស្លាក​លេខ​ សៀមរាប​ 2B-1656​ ក្នុង​ទិស​ដៅ​ផ្ទុយ​គ្នា​ពី​កើតមក​លិច​ បណ្តាល​ឲ្យ​ស្លាប់​ភ្លាមៗ​នៅ​នឹង​កន្លែង​ ។​

​ចំណែក​អ្នក​បើករថយន្ត​ ក្រោយ​ពី​មាន​ហេតុការណ៍​គ្រោះថ្នាក់​ចរាចរណ៍​បាន​បើករថយន្ត​យក​ទៅ​លាក់​ទុក​នៅ​ចំណុច​ជើងភ្នំ​ស្វាយ​ ស្ថិត​ក្នុង​សង្កាត់​អូរ​អំបិល​ ក្រុង​សិរី​សោភ័ណ​ ហើយ​រត់គេច​ខ្លួន​បាត់​ តែ​ត្រូវ​បាន​កម្លាំង​នគរបាល​ចរាចរណ៍​ស្រាវជ្រាវ​ឃើញ​រថយន្ត​ឃាត់​នាំ​យក​មក​រក្សា​ទុក​នៅ​ការិយាល័យ​នគរបាល​ចរាចរណ៍​ ដើម្បី​ស្រាវជ្រាវ​រក​ម្ចាស់​មក​ដោះស្រាយ​តាម​នីតិវិធី​ ។​ ចំណែក​សព​ជន​រង​គ្រោះ​ បាន​ប្រគល់​ជូន​ក្រុម​គ្រួសារ​យក​ទៅ​ចាត់ចែង​ធ្វើបុណ្យ​តាម​ប្រពៃណី​ ៕

មតិយោបល់