ព័ត៌មានជាតិ

បុរស​ម្នាក់​ត្រូវ​បាន​ប្រជាពលរដ្ឋ​ ប្រទះ​ឃើញ​សាកសពស្លាប់នៅ​ក្នុង​ទឹកអូរ

​ពោធិ៍សាត់:​ យោងតាមផេក អគ្គស្នងការដ្ឋាននគរបាលជាតិ បានឲ្យដឹងថា​ បុរស​ម្នាក់​ត្រូវ​បាន​ប្រជាពលរដ្ឋ​ប្រទះ​ឃើញ​ស្លាប់​ក្នុង​ទឹកអូរ​ ស្ថិត​នៅ​ចំណុច​អូរ​បឹង​ប្រិ​យ៍​ ក្នុងភូមិ​បឹង​ប្រិ​យ៍​ ឃុំ​ត្រពាំង​ជង​ ស្រុក​បាកាន​ ខេត្តពោធិ៍សាត់​ កាលពី​វេលា​ម៉ោង​១៦​និង​០០​នាទី​រសៀល​ ថ្ងៃ​ទី​២២​ ខែមិថុនា​ ឆ្នាំ​២០២២​ ។​

​លោក​អនុសេនីយ៍ឯក​ លន់​ ប៊ុ​ន​រ៉ា​ នាយ​ប៉ុស្តិ៍​នគរបាល​ត្រពាំង​ជង​ បាន​ប្រាប់​ឲ្យ​ដឹង​ថា​ ក្រោយ​ទទួល​ព័ត៌មាន​ពី​ប្រជាពលរដ្ឋ​ លោក​បាន​រាយការណ៍​ជូន​កម្លាំង​ជំនាញ​ផ្នែក​ពិនិត្យ​វិភាគ​ទីកន្លែង​កើតហេតុ​ បាន​សហការ​ជាមួយ​ កម្លាំង​ជំនាញ​ការិយាល័យ​បច្ចេកទេស​វិទ្យាសាស្ត្រ​ខេត្ត​ និង​គ្រូពេទ្យ​កោសល្យ​វិ​ច្ច័​យ​ពេទ្យ​ខេត្ត​ បាន​ចុះ​ទៅ​ដល់​កន្លែង​កើតហេតុ ​និង​ធ្វើការ​ពិនិត្យ​ ទីកន្លែង​កើតហេតុ ​ស្ថិត​នៅ​ខាងជើង​ឈាង​ខាងកើត​ផ្ទះ​របស់​សព​ប្រហែល​៣០០​ម៉ែត្រ​ ។​

​ដោយ​សព​ត្រូវ​បាន​ក្រុម​គ្រួសារ​លាង​សំអាត​ យក​មក​តម្កល់​នៅ​លើ​គ្រែ​មុខ​ផ្ទះ​របស់​ឈ្មោះ​ នៅ​ ស្រី​ល័​ក្ខ​ ភេទ​ស្រី​ អាយុ​២៨​ឆ្នាំ​ ត្រូវជា​ប្រពន្ធ​ជន​រង​គ្រោះ​ ស្ថិត​ក្នុងភូមិ​-​ឃុំ​ខាងលើ​ ។​

​ក្រោយ​ធ្វើការ​ពិនិត្យ​លើ​សព​ជន​រង​គ្រោះ​ឈ្មោះ​ ឌំ​ គក់​ ភេទ​ប្រុស​ អាយុ​៣១​ឆ្នាំ​ ជនជាតិ​ខ្មែរ​ មាន​កម្ពស់​១.៦០​ម៉ែត្រ​ សម្បុរ​ខ្មៅ​ស្រអែម​ មុខរបរ​កសិករ​ មាន​ទីលំនៅ​ភូមិ​បឹង​ប្រិ​យ៍​ ឃុំ​ត្រពាំង​ជង​ ស្រុក​បាកាន​ ខេត្តពោធិ៍សាត់​ ។​ សព​មាន​សភាព​រឹង​តាម​សន្លាក់​ លើ​ផ្នែក​ក្បាល​ ដងខ្លួន​ និង​អវ:យវ:​ គ្មាន​ស្លាកស្នាម​អ្វី​គួរ​ឲ្យ​សង្ស័យ​ យោង​តាម​ការ​បំភ្លឺ​ជុំវិញ​ទីកន្លែង​កើតហេតុ​ និង​ការ​ពិនិត្យ​សាកសព​ជាមួយ​គ្រូពេទ្យ​ជំនាញ​ ​សន្និដ្ឋាន​បាន​ថា​ ជន​រង​គ្រោះ​ឈ្មោះ​ ឌំ​ គក់​ ពិតជា​ស្លាប់​ដោយសារ​លង់ទឹក​ប្រាកដ​មែន​ ដោយ​សព​ខាងលើ​បាន​ស្លាប់​លើស​ពី​០៦​ម៉ោង​ឡើង ​។​

​បច្ចុប្បន្ន​សព​ជន​រង​គ្រោះ​ ត្រូវ​បាន​សមត្ថកិច្ច​ប្រគល់​ឲ្យ​ក្រុម​គ្រួសារ​ យក​ទៅ​ធ្វើបុណ្យ​តាម​ប្រពៃណី​ ៕

មតិយោបល់