(តាលិន)៖ អេស្ដូនី អាចនឹងរលាយបាត់ចេញពីផែនទីពិភពលោក ហើយរដ្ឋធានីតាលិនអាចនឹងខ្ទេចខ្ទីរាបដល់ដី នៅក្រោមផែនការរបស់ បក្សសម្ព័ន្ធយោធា NATO ដែលមានស្រាប់នាពេលបច្ចុប្បន្ន ដើម្បីការពារប្រទេសក្នុងតំបន់បាល់ទិកពីការវាយប្រហារណាមួយពីសំណាក់ រុស្ស៉ី។

នាយករដ្ឋមន្ត្រីអេស្ដូនី លោកស្រី កាចា កាឡាស់ (Kaja Kallas) ធ្វើការកត់សម្គាល់ខាងលើប្រាប់អ្នកសារព័ត៌មាន នៅថ្ងៃពុធសប្ដាហ៍នេះ ជាមួយការរិះគន់ថាផែនការការពាររដ្ឋទាំង៣ ក្នុងតំបន់បាល់ទិក ដែលមានស្រាប់របស់ NATO មិនអាចការពារពួកគេពីការឈ្លានពាន នោះទេ។ បន្ថែមពីលើនេះ តាមរយ:ការប្រៀបធៀបទៅនឹងសង្រ្គាមនៅអ៊ុយក្រែន លោកស្រី កាឡាស់ ក៏បានសង្កត់ធ្ងន់ផងដែរថាសង្រ្គាម នៅអ៊ុយក្រែន បានអូសបន្លាយពេលដល់ច្រើនជាង ១០០ថ្ងៃហើយ តែប្រសិនបើប្រៀបធៀបទំហំទឹកដីអ៊ុយក្រែន និងប្រទេសទាំង៣ ក្នុងតំបន់បាល់ទិក នោះមានន័យថារដ្ឋបាល់ទិកទាំង៣ នឹងត្រូវបានបំផ្លាញទាំងស្រុងបាត់ចេញពីផែនទីពិភពលោក។

ការអត្ថាធិប្បាយខាងលើរបស់លោកស្រី កាឡាស់ កើតមានឡើង នៅមុនកិច្ចប្រជុំកំពូល NATO ដែលនឹងត្រូវរៀបចំឡើង ក្នុងទីក្រុងម៉ាឌ្រីដ ប្រទេសអេស្ប៉ាញ នៅថ្ងៃអង្គារសប្ដាហ៍ក្រោយនេះ។ កិច្ចពិភាក្សានឹងផ្ដោតសំខាន់លើការពង្រឹងខែ្សការពារក្នុងតំបន់ អឺរ៉ុបខាងកើត ក្នុងនោះរួមមានទាំងតំបន់បាល់ទិក ដែលមានប្រទេសចំនួនគឺ អេស្ដូនី លីទុយអានី និងឡេតូនី។ រដ្ឋក្នុងតំបន់បាល់ទិកទាំង៣ បានអំពាវនាវឱ្យ NATO ដាក់ពង្រាយកងទ័ពបន្ថែមលើទឹកដីរបស់ខ្លួន ហើយបើតាមលោកស្រី កាឡាស់ ចំនួនកងទ័ព NATO ក្នុងរដ្ឋបាល់ទិកនីមួយៗ គួរតែបង្កើនចន្លោះ ២០,០០០ ដល់ ២,៥០០០នាក់៕

ប្រភព៖ Financial Times