-

បុរសម្នាក់បើករថយន្តតាកូម៉ា រេចង្កូតបុកស្រ្តីវ័យចំណាស់ម្នាក់កំពុងដើរ បណ្តាលឲ្យរងរបួសជាទម្ងន់

ពោធិ៍សាត់: យោងតាមផេក ផ្សព្វផ្សាយអប់រំ ក្រសួងមហាផ្ទៃ បានឲ្យដឹងថា កាលពីថ្ងៃទី២៩ ខែសីហា ឆ្នាំ២០២២​ វេលាម៉ោង​១៣និង៣៥នាទី ​មានរកណីគ្រោះថ្នាក់ចរាចរណ៍ បង្កឡើងដោយរថយន្តរេចង្កូតបុកស្រ្តីកំពុងដើរចំពីក្រោយ បណ្តាលឲ្យរងរបួសធ្ងន់ នៅលើផ្លូវជាតិ៥៥ ត្រង់ចំណុចគីឡូម៉ែត្រ លេខ១០៩-១១០ មុខការ៉ាស់សាំងស្រ៊ុន​ រតន: ស្ថិតក្នុងភូមិប្រម៉ោយ​ ឃុំប្រម៉ោយ​ ស្រុកវាលវែង​ ខេត្តពោធិ៍សាត់ ​។

តាមរបាយការណ៍នគរបាលស្រុកភ្នំក្រវាញ បានឲ្យដឹងថា រថយន្តបង្កម៉ាកតាកូម៉ា ពណ៌ទឹកប្រាក់ ពាក់ស្លាកលេខពោធិ៍សាត់ 2A-5156 បើកបរដោយឈ្មោះ ប៊ិន​ សុវណ្ណ​ ភេទប្រុស​ អាយុ៦១ឆ្នាំ​ ទីលំនៅភូមិស្ទឹងថ្មី​ ឃុំប្រម៉ោយ​ ស្រុកវាលវែង​ ខេត្តពោធិ៍សាត់​ បើកបរក្នុងទិសដៅពីលិចទៅកើតស្របគ្នា ជាមួយអ្នកថ្មើរជើង ។ លុះបើកមកដល់ចំណុចខាងលើ បានរេចង្កូតទៅបុកស្រ្ដីចំណាស់ម្នាក់ ឈ្មោះ ម៉ុត​ ម៉ៅ​ ភេទស្រី​ អាយុ​៦៣ឆ្នាំ​ ទីលំនៅភូមិប្រម៉ោយ​ ឃុំប្រម៉ោយ​ ស្រុកវាលវែង​ ខេត្តពោធិ៍សាត់​ ចំពីក្រោយពេញទំហឹង បណ្ដាលឲ្យរងរបួសធ្ងន់ រីឯជនរងគ្រោះដោយសារស្ថានភាពធ្ងន់ធ្ងរ ត្រូវបានបញ្ជូនទៅសង្រ្គោះបន្ទាន់ នៅមន្ទីរពេទ្យបង្អែកខេត្ត​ពោធិ៍សាត់​ ។

របាយការណ៍បានឲ្យដឹងទៀតថា ករណីគ្រោះថ្នាក់ចរាចរណ៍ បណ្តាលមកពីកត្តាបើកបរខ្វះការប្រុងប្រយ័ត្ន ។ ចំណែករថយន្តបង្ក ត្រូវបានកម្លាំងសមត្ថកិច្ច យកមករក្សាទុកនៅ​អធិការដ្ឋាននគរបាលស្រុកវាលវែង រង់ចាំដើម្បីចាត់ការបន្តទៅតាមនីតិវិធី ៕

មតិយោបល់