ព្រះសីហនុៈ យោងតាមផេក ផ្សព្វផ្សាយអប់រំ ស្នងការដ្ឋាននគរបាលខេត្តព្រះសីហនុ បានឲ្យដឹងថា កាលពីថ្ងៃទី២៤ ខែតុលា ឆ្នាំ២០២២ វេលាម៉ោង ១៩និង៣០នាទី រំលងអធ្រាត្រ នៅចំណុចភូមិ២ សង្កាត់២ ក្រុង-ខេត្តព្រះសីហនុ មានករណីលួចមានស្ថានទម្ងន់ទោស (លួចកាច់បំបែកសោកម៉ូតូ) មួយបានកើតឡើងបង្កឡើងដោយជនសង្ស័យ០២នាក់ (បុ្រស១ ស្រី១) មិនស្គាល់អត្តសញ្ញាណ បានធ្វើសកម្មភាព លួចម៉ូតូរបស់ប្រជាពលរដ្ឋចំនួន០១គ្រឿង ម៉ាកហុងដាឌ្រីមសេ១២៥ ស៊េរីឆ្នាំ២០១៨ ពណ៌ក្រហមរួចគេចខ្លួនបាត់ បន្ទាប់ពីទទួលបានព័ត៌មាននេះ លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ បានចាត់ឲ្យ កម្លាំងការិយាល័យនគរបាលព្រហ្មទណ្ឌកម្រិតស្រាល បានធ្វើការស្រាវជ្រាវយ៉ាងយកចិត្តទុកដាក់ រហូតដល់ថ្ងៃទី០៤ ខែវិច្ឆិកា ឆ្នាំ២០២២ វេលាម៉ោង២៣និង៣០នាទី ទើបឃាត់ខ្លួនបានជនសង្ស័យទាំង០២នាក់ ជាបន្តបន្ទាប់ ព្រមទាំងដកហូតបានវត្ថុតាង ម៉ូតូ០១គ្រឿងម៉ាក ហុងដាឌ្រីម សេ១២៥ ស៊េរីឆ្នាំ២០១៨ ឡើងតែមឆ្នាំ២០២២ ពណ៌ក្រហម ដែលជាផលនៃអំពើចោរកម្ម ។

ជនរងគ្រោះឈ្មោះ ព្រំ សៅមុន្នី ភេទស្រី អាយុ ៣០ឆ្នាំ ជនជាតិខ្មែរ មុខរបរ លក់ដូរ មានទីលំនៅ ភូមិ០២ សង្កាត់០៣ ក្រុង-ខេត្តព្រះសីហនុ ។ សម្ភារៈបាត់បង់៖ ម៉ូតូម៉ាកអាសង់សេរ៊ីឆ្នាំ២០១៨ ពណ៌ក្រហម ។

ជនសង្ស័យចំនួន០២នាក់៖ ១-ឈ្មោះ ជីម ពន្លក ភេទប្រុស អាយុ ២២ឆ្នាំ ជនជាតិខ្មែរ មុខរបរ ជាងម៉ូតូ ស្នាក់នៅភូមិ៤ សង្កាត់៤ ក្រុង-ខេត្តព្រះសីហនុ ។ ២-ឈ្មោះ លុក ស្រីណែត ភេទស្រី អាយុ ១៧ ឆ្នាំ ជនជាតិខ្មែរ មុខរបរ អ្នករត់តុ ស្នាក់នៅភូមិ ០២ សង្កាត់១ ក្រុង-ខេត្តព្រះសីហនុ ។

វត្ថុតាងចាប់យកបានជាក់ស្តែងមាន៖ -ម៉ូតូ០១គ្រឿង ម៉ាកអាសង់ស៊េរីឆ្នាំ ២០១៨ ពណ៌ក្រហម ចំនួន០១គ្រឿង (ផលនៃអំពើចោរកម្ម) ។ -ទូរស័ព្ទម៉ាក iphone xs max ពណ៌ទឹកមាស ០១ គ្រឿង ។

បច្ចុប្បន្នការិយាល័យនគរបាលព្រហហ្មទណ្ឌកម្រិតស្រាល កំពុងបន្តនីតិវិធី តាមផ្លូវច្បាប់ ៕