-

បុរសម្នាក់បើករថយន្ត Lexus ​RX300 ក្នុងល្បឿនលឿនជ្រុលទៅបុកពីក្រោយ Toyota Prius បណ្តាលឲ្យរងការខូចខាតទាំងសងខាង

ភ្នំពេញ:​ នៅ​វេលា​ម៉ោង០​៨និង៣០នាទីយប់​ថ្ងៃទី​១៧ ខែវិច្ឆិកា ​ឆ្នាំ​២០២២ បុរសម្នាក់ស្រវឹង​បើករថយន្តម៉ាក Lexus ​RX300 មួយគ្រឿង ​​ជ្រុល​ទៅ​បុក​រថយន្តម៉ាក Toyota Prius ​មួយ​គ្រឿងទៀត ​ចត​នៅ​លើ​ផ្លូវ បណ្តាលឲ្យរងការខូចខាត ទាំងសងខាងយ៉ាងដំណំ ទីតាំង​ទល់មុខ​សាលាបឋមសិក្សា​អនុវត្ត​រាជធានី​ ស្ថិតតាមបណ្ដោយ​ផ្លូវ​២៧១​ សង្កាត់​អូរបែក​ក្អម​ ខណ្ឌ​សែនសុខ រាជធានីភ្នំពេញ ​។

ហេតុការណ៍៖ ​នៅ​មុន​ពេល​កើតហេតុ​គេឃើញ​បុរស​ស្រវឹងម្នាក់ បើករថយន្ត​១គ្រឿង​ម៉ាក​ Lexus ​RX300 ពណ៌​ទឹកប្រាក់​ ពាក់ស្លាកលេខ​ ភ្នំពេញ​ 2AG-4467 ធ្វើដំណើរ​តាមបណ្ដោយ​ផ្លូវ​២៧១​ ​ពី​ជើងទៅត្បូង​ក្នុងល្បឿន​​លឿន មកដល់ចំណុច​កើតហេតុ​ រថយន្ត​នោះ​ជ្រុល​ទៅ​បុក​រថយន្ត​ម៉ាក​ Toyota Prius​ ពណ៌​ខៀវ​ ពាក់ស្លាកលេខ​ ភ្នំពេញ ​2BA-7760 ​កំពុង​ឈប់​ចត​នៅ​លើ​ចិញ្ចើម​ផ្លូវ​បណ្ដាល​ឲ្យ​ក្រពឹត​និងបែក​ចង្កៀង​ខាង​ក្រោយ​ចំហៀង​ខាង​ឆ្វេង ​រី​ឯ​រថយន្ត​ Lexus ​RX300 បាន​រងការខូចខាត​ក្រពឹត​និង​ចង្កៀង​ខាងមុខ​ចំហៀង​ខាង​ស្ដាំ ​។

នៅក្រោយ​ពេល​កើតហេតុ ​ភាគី​ទាំង​ពីរ​ចរចា​គ្នា​មិន​ត្រូវ ​សមត្ថកិច្ចចុះមកធ្វើការ​វាស់វែង ​យក​រថយន្ត​ទាំង​ពីរ​គ្រឿងទៅ​រក្សា​ទុក ​នៅ​អធិការ​ដ្ឋាន​នគរបាល​ខណ្ឌ​សែនសុខ ​ដើម្បី​រង់ចាំ​ដោះស្រាយ​នាពេលក្រោយទៅ​តាម​ផ្លូវ​ច្បាប់​ ៕

មតិយោបល់