ពោធិ៍សាត់: យោងតាមផេក អគ្គស្នងការដ្ឋាននគរបាលជាតិ បានឲ្យដឹងថា បុរសម្នាក់ត្រូវសមត្ថកិច្ចនគរបាលស្រុកកណ្តៀង ចាប់ឃាត់ខ្លួន ពាក់ព័ន្ធករណីបង្កអំពើហិង្សាវាយទៅលើប្រពន្ធយ៉ាងដំណំ បណ្តាលឲ្យរងរបួសធ្ងន់ ករណីនេះកើតឡើងនៅចំណុចផ្ទះជនសង្ស័យ ស្ថិតក្នុងភូមិនៅកញ្ជើបាយដាច ឃុំអន្លង់វិល ស្រុកកណ្តៀង ខេត្តពោធិ៍សាត់ កាលពីវេលាម៉ោង១៧និង១៥នាទី ថ្ងៃទី២៣ ខែវិច្ឆិកា ឆ្នាំ២០២២ ។

លោកវរសេនីយ៍ទោ កែ ហុងឈាង អធិការរង នៃអធិការដ្ឋាននគរបាលស្រុកកណ្តៀង បានប្រាប់ឲ្យដឹងថា ដោយទទួលព័ត៌មានពីជនរងគ្រោះ ឈ្មោះ នឿន ចាន់ថា ភេទស្រី អាយុ៣១ឆ្នាំ រស់នៅភូមិកញ្ជើបាយដាច ឃុំអន្លង់វិល ស្រុកកណ្តៀង ខេត្តពោធិ៍សាត់ បានប្តឹងរាយការណ៍ដល់សមត្ថកិច្ចថា ឈ្មោះ ស៊ី ម៉ៅ ភេទប្រុស អាយុ ៣០ ឆ្នាំ ត្រូវជាប្តី បានឈ្លោះប្រកែកដោយប្រើពាក្យសម្តីដាក់គ្នាទៅវិញទៅមក ខណ:ពេលនោះប្តីបានប្រើអំពើហិង្សា វាយមកលើខ្លួនបណ្តាលឲ្យរងរបួសធ្ងន់ធ្ងរ ភ្លាមៗនោះកម្លាំងបានចុះអន្តរាគមន៍ដល់កន្លែងកើតហេតុ ។

លោកអធិការរងបានបញ្ជាក់ឲ្យដឹងថា ករណីនេះហិង្សខាងលើ គឺបង្កឡើងដោយបុរសជាប្តី ខឹងប្រពន្ធខ្លួនលក់ដីធ្លីមិនប្រាប់ ទើបបណ្តាលឲ្យមានរឿងរ៉ាវឈ្លោះប្រកែកគ្នាដូចនេះ ។

បច្ចុប្បន្នជនសង្ស័យ ត្រូវបានសមត្ថកិច្ចឃាត់ និងនាំខ្លួនបញ្ជូនមកអធិការដ្ឋាននគរបាលស្រុកកណ្តៀង ដើម្បីបំពេញបែបបទតាមនីតិវិធី ៕