ភ្នំពេញ: នាវេលាម៉ោង១២និង០០នាទីយប់ថ្ងៃទី២៩ ខែវិច្ឆិកា ឆ្នាំ២០២២ មានករណីគ្រោះថ្នាក់ចរាចរណ៍ មួយបានកើតឡើង រថយន្ត ម៉ាក CAION មួយគ្រឿង និងរថយន្តម៉ាក Toyota Prius មួយគ្រឿង បុកគ្នាពេញទំហឹងនៅផ្លូវបែកជាបួន បណ្តាលឲ្យខ្ទាតទៅបុករបងផ្ទះពលរដ្ឋរងការខូចខាត ទីតាំងត្រង់ចំណុចស្តុប២៤ម៉ោងសែនសុខ ស្ថិតតាមបណ្ដោយផ្លូវហាណូយ កែងនឹងផ្លូវសម្តេច ជា ស៊ីម សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ។
ហេតុការណ៍៖ នៅមុនពេលកើតហេតុ គេឃើញស្ត្រីម្នាក់បើករថយន្តម៉ាកToyota Prius ពណ៌ស មួយគ្រឿង ពាក់ស្លាកលេខភ្នំពេញ2AZ-6983 ធ្វើដំណើរតាមបណ្ដោយផ្លូវសម្ដេចជាស៊ីម មានទិសដៅពីលិចទៅកើត ពេលនោះក៏មានរថយន្តមួយគ្រឿងទៀតម៉ាក CAION ពណ៌ស ពាក់ស្លាកលេខ ភ្នំពេញ 2BO-5672 បើកដោយបុរសម្នាក់ តាមបណ្ដោយផ្លូវហាណូយ មានទិសដៅពីត្បូងទៅជើង ក្នុងល្បឿនលឿន មកដល់ចំណុចកើតហេតុ រថយន្តទាំងពីរគ្រឿងបុកគ្នាពេញទំហឹង បណ្តាលឲ្យរថយន្តម៉ាក CAION បានខ្ទាតទៅបុករបងផ្ទះពលរដ្ឋបណ្ដាលឲ្យរងការខូចខាត ចំណែករថយន្ត Toyota Prius បានរងការខូចខាតផ្នែកខាងមុខយ៉ាងដំណំ បន្ទាប់ពីកើតហេតុតៃកុងរថយន្ត CAION បានចុះគេចខ្លួនបាត់ស្រមោល ។
នៅក្រោយពេលកើតហេតុ សមត្ថកិច្ចបានចុះធ្វើការវាស់វែងយករថយន្តទាំងពីរគ្រឿងយកទៅរក្សាទុក នៅការិយាល័យចរាចរណ៍ផ្លូវគោក នៃស្នងការដ្ឋាននរគបាលរាជធានីភ្នំពេញ ដើម្បីរង់ចាំដោះស្រាយតាមផ្លូវច្បាប់ ៕
មតិយោបល់