-

ជនសង្ស័យម្នាក់ចូលលួចសម្ភារៈ ក្នុងការដ្ឋានសំណង់ ​ត្រូវកម្មករឃើញទាន់ ក៏នាំគ្នាដេញចាប់បានវាយឡើងទ្រោមខ្លួន

ភ្នំពេញ:​ ​កាល​ពី​វេលាម៉ោង​១០និង៤០នាទីយប់​ថ្ងៃទី​២០ ខែធ្នូ ​ឆ្នាំ​២០២២ ជនសង្ស័យ​ម្នាក់​ត្រូវ​បាន​ប្រជាពលរដ្ឋ និងកម្មករសំណង់​ចាប់បាន​ប្រគល់​ឲ្យ​ទៅ​សមត្ថកិច្ច​ បន្ទាប់​ពី​ធ្វើសកម្មភាព​ចូល​លួច​ប៉ុសផ្សាដែក ​នៅ​ក្នុង​ការដ្ឋាន​សំណង់​មិន​បាន​សម្រេច ទីតាំងត្រង់​ចំណុច​ការដ្ឋាន​សំណង់​ ស្ថិតតាមបណ្ដោយ​ផ្លូវ​២៨៩​ សង្កាត់​បឹងកក់​ទី​២​ ខណ្ឌ​ទួលគោក រាជធានីភ្នំពេញ ជនសង្ស័យ​ឈ្មោះ​ ជូ​ ភេទប្រុស​ អាយុ​១៩ឆ្នាំ​ មុខរបរ​និង​ស្នាក់​នៅ​មិន​ពិត​ប្រាកដ ​។

ដំណើររឿងហេតុ៖ យោងតាមប្រភព​ព័ត៌មាន នៅ​​កន្លែង​កើតហេតុ​បានឲ្យដឹងថា​ នៅ​ការដ្ឋាន​សំណង់​កើតហេតុ ​គឺ​មាន​កម្មករ​ប្រុស​ស្រី​ប្រមាណ​៣០នាក់ ​ធ្វើការ​និង​ស្នាក់នៅ​ខាង​ក្នុង​ ហើយ​កន្លងមក​ការដ្ឋាននេះ​ធ្លាប់មាន​ជនសង្ស័យ​ចូល​ទៅ​លួច​សម្ភារ: ហើយ​នៅ​យប់​កើតហេតុ​ ពេលចប់ការងារ​កម្មករ​ទាំង​អស់ ​ក៏​បាន​សំរាក​តាម​កន្លែង​​រៀងៗ ​ដូច​សព្វដង ​លុះដល់វេលា​កើតហេតុ ​ក៏​ស្រាប់​តែ​លេច​មុខ​​ជនសង្ស័យ​បានដើរមកចូល​ក្នុង​ការដ្ឋាន​ ហើយ​ក៏បាន​ធ្វើសកម្មភាព​លួច​ប៉ុស​ផ្សាដែក​បំ​រុង​យក​​គេចខ្លួន ​ពេល​នោះ​ក៏​មាន​ស្ត្រី​ជាកម្មករ​សំណង់​ម្នាក់ ​បាន​ភ្ញាក់​ដឹង​ខ្លួន​និង​ឃើញ​ជនសង្ស័យ ​ក៏ស្រែក​ឆោឡោ​ បង្ក​ឲ្យ​មាន​ការភ្ញាក់​ផ្អើលកើតឡើង​ដល់​កម្មករ​ផ្សេង​ទៀត ​។ ហើយ​ជនសង្ស័យ​ក៏បាន​ទំលាក់​ប៉ុសផ្សាដែក​នោះ​ចុះ​ រួច​រត់​គេចខ្លួន​ចេញ​ពី​កន្លែង​កើតហេតុ ​តែក៏​មាន​កម្មករ​ប៉ុន្មាន​នាក់​រត់ដេញ​តាម​ពី​ក្រោយ​និង​ស្រែក​ចោរៗ​ រហូត​អាច​ស្ទាក់​ចាប់បាន​នៅ​ផ្សារ​៧មករា​ភ្លាមៗ​តែម្ដង​ ហើយ​ក៏មាន​ប្រជាពលរដ្ឋ​ក្បែរ​នោះ​បាន​ចេញ​មក​ជួយ​ស្វាគមន៍​ម្នាក់​មួយ​ដៃមួយជើង​ឡើង​ទ្រោម​ខ្លួន ​។

បច្ចុប្បន្ន​ជនសង្ស័យ​រួមទាំង​វត្ថុ​តាង ​ត្រូវ​បាន​សមត្ថកិច្ច​នាំ​ខ្លួន​យក​ទៅ​ប៉ុស្តិ៍​នរគបាលរដ្ឋបាល​បឹងកក់​ទី​២ ដើម្បី​ធ្វើការ​សាកសួរ ​និង​ចាត់​ការ​ទៅ​តាម​នីតិវិធីច្បាប់ ៕



មតិយោបល់