ក្រុមថៃអាវក្រហមជាង៤ម៉ឺននាក់ ដែលគាំទ្រអតីតនាយករដ្ឋមន្រ្តី ត្រូវ បណ្តេញចេញពីអំណាច កាលពីឆ្នាំ២០០៦ គឺលោក ថាក់ស៊ីន ស៊ីណាវ៉ាត នឹងធ្វើដំណើរមកខេត្តសៀមរាប ដើម្បីជួបជាមួយលោក ថាក់ស៊ីន ដែលគេរំពឹងថានឹងមកកម្ពុជានៅ ថ្ងៃបុណ្យចូលឆ្នាំខ្មែរដែលនឹងប្រព្រឹត្តទៅនៅថ្ងៃទី១៣ដល់ថ្ងៃ ទី១៥ខែមេសានេះ។ អាជ្ញាធរខេត្តសៀមរាប បានរៀបចំផ្ទៃដីទំហំ១៥ហិកតារួចជាស្រេច ត្រៀមសម្រាប់ទីតាំងស្នាក់នៅរបស់ក្រុមថៃអាវក្រហមទាំងនោះ។
តាមគម្រោងលោក ថាក់ស៊ីន ស៊ីណាវ៉ាត អតីតនាយករដ្ឋមន្រ្តីថៃ នឹងមកខេត្តសៀមរាបនៅថ្ងៃទី១៤ដល់ថ្ងៃទី១៥ ខែមេសានេះ ដោយមានអ្នកគាំទ្រ ក្រុមថៃអាវក្រហម៤ម៉ឺននាក់មកស្វាគមន៍។ដោយមានការព្រមព្រៀងរវាង រដ្ឋាភិបាលខ្មែរនិងរដ្ឋាភិបាលថៃ ក្រុមថៃអាវ ក្រហម៤ម៉ឺននាក់ នឹងធ្វើដំណើរមកខេត្តសៀមរាបនៅថ្ងៃទី១៣ មុនមួយថ្ងៃដំណើរមក ដល់របស់លោកថាក់ស៊ីន ។ដំណើរមកដល់ជាថ្មីរបស់លោក ថាក់ស៊ីន នៅកម្ពុជា ត្រូវបានអះអាង ថាដើម្បីប្រារព្ធបុណ្យចូលឆ្នាំថ្មី ជាមួយអ្នកគាំទ្រ។ ចំពេលដែលពិធី បុណ្យចូលឆ្នាំខ្មែរ-ថៃ ធ្វើឡើងដំណាលគ្នា។ នេះបើតាមការឲ្យដឹងពីអាជ្ញាធរ ខេត្តសៀមរាប។
អភិបាលក្រុងសៀមរាប លោក ទេព ប៊ុនឆាយ បានឲ្យដឹងថាដីទំហំ១៥ហិកតា ស្ថិតនៅបរិវេណអង្គរឃ្យុងយូ ក្នុងក្រុងសៀមរាប បានរៀបចំរួចជាស្រេចសម្រាប់ត្រៀម ទទួលក្រុមថៃអាវក្រហម៤ម៉ឺននាក់។កម្លាំងសន្តិសុខរាប់រយនាក់ គ្រោងនឹងពង្រាយផង ដែរដើម្បីជួយការពារសុវត្ថិភាព ក្នុងពិធីមីតធីង(Meeting) ដ៏ធំដែលរៀបចំឡើងដោយ ក្រុមថៃអាវក្រហមជាមួយលោកថាក់ស៊ីន។
លោក ថាក់ស៊ីន មិត្តជិតស្និទ្ធរបស់លោកនាយករដ្ឋមន្រ្តី ហ៊ុន សែន បានធ្វើដំណើរមកកម្ពុជាជាច្រើនលើក ចាប់តាំងពីនាយករដ្ឋមន្រ្តីកម្ពុជា បានតែង តាំងគាត់ធ្វើជាទីប្រឹក្សាសេដ្ឋកិច្ចនៅខែតុលា ឆ្នាំ២០០៩។ តំណែងនេះត្រូវបាន លុបចោលវិញ ពេលដែលទំនាក់ទំនងទ្វេភាគីរវាងកម្ពុជាថៃធ្លាក់ចុះ ក្រោយជម្លោះព្រំដែនក្បែរប្រាសាទព្រះវិហាររបស់កម្ពុជា។
ការបោះឆ្នោតជ្រើសរើសអ្នកស្រី យីងឡាក់ ស៊ីណាវ៉ាត ប្អួនស្រីលោក ថាក់ស៊ីន ជានាយករដ្ឋមន្រ្តីថៃ កាលពីខែមិថុនាឆ្នាំមុន ធ្វើឲ្យទំនាក់ទំនងការទូតរវាងប្រទេសកម្ពុជាថៃល្អឡើងវិញ។ រហូតដល់មាន កិច្ចប្រជុំលើកដំបូងកាលពីថ្ងៃពុធរវាងក្រុមការងាររួមកម្ពុជា និងថៃ JWG ( Joint Working Group )។ ភាគីទាំង២ប្តេជ្ញាបន្តអនុវត្តដីកាបង្គាប់តុលាការយុត្តិធម៌ អន្តរជាតិទីក្រុងឡាអេ (ICJ) កាលពីខែកក្កដា ឆ្នាំ២០១១ស្តីពីការដកកងទ័ពកម្ពុជានិងថៃចេញពីតំបន់គ្មានកងទ័ព បណ្តោះអាសន្នទំហំជាង១៧គីឡូម៉ែត្រក្រឡានៅផ្តុំព្រំដែនប្រាសាទ ព្រះវិហារ៕
អត្ថបទដោយ៖ khmer.fri.fr
មតិយោបល់