ខណៈពេលដែលមានប្រទេសជាច្រើន រួមនឹងអង្គការសហប្រជាជាតិ កំពុងតែធ្វើការថ្កោលទោសយ៉ាងខ្លាំងទៅលើការបាញ់គ្រាប់រ៉ូកែតរបស់កូរ៉េខាងជើង ស្រាប់តែមេដឹកនាំនៃប្រទេសមួយនេះ សាទរចំពោះជោគជ័យនៃការបាញ់រ៉ូកែត។
យោងតាមសារព័ត៌មាននៅក្នុងស្រុកមួយបានឲ្យដឹងថា លោក គីម ចុងអ៊ុន មេដឹកនាំកំពូល នៃប្រទេសកូរ៉េខាងជើង បានចេញនូវលិខិត ជាផ្លូវការណ៍មួយ កាលពីវេលាម៉ោង ៨ព្រឹក ថ្ងៃទី ១២ខែ១២ ឆ្នាំ ២០១២ ម៉ោងក្នុងតំបន់ ដោយបញ្ជាឲ្យបាញ់បង្ហោះ ផ្កាយរណប ក្វាងមីយ៉ុងសុង-3 នៅឯស្ថានីយអវកាស ភាគខាងលិច ទីក្រុងព្យុងយ៉ាង ហើយបន្ទាប់មក ក៏មានការបញ្ជាឲ្យបាញ់ បង្ហោះជាស្ថាពរតែម្តងនៅ វេលាម៉ោង ៩ព្រឹក។
បន្ទាប់ពីការបាញ់ចេញនូវ ផ្កាយរណប ដែលបញ្ជូនទៅកាន់ ទីអវកាស ដោយគ្រាប់ រ៉ុក្កែតអ៊ុនហា-3 នោះមក មេដឹកនាំកូរ៉េ ខាងជើង បានចេញមកអបអរសាទរ ជាមួយ នឹងក្រុមការងារ បច្ចេកទេសទាំងឡាយ នៅខាងក្រៅទីបញ្ជាការដ្ឋាន។
គួរបញ្ជាក់ផងដែរថា លោក គីម ចុងអ៊ុន មេដឹកនាំកំពូល នៃប្រទេសកូរ៉េខាងជើង បានដឹកនាំដោយ ផ្ទាល់តែម្តង ចំពោះការបាញ់គ្រាប់ រ៉ុក្កែត កាលពីថ្ងៃទី១២ ខែធ្នូ ឆ្នាំ២០១២ នោះ។ លោក គីម បានមានវត្តមាននៅ មជ្ឈមណ្ឌលបញ្ជាការ និង គ្រប់គ្រងផ្កាយរណប ព្យុងយ៉ាង ព្រមទាំងធ្វើ ការត្រួតពិនិត្យ ដោយ ផ្ទាល់ទៅលើការ រៀបចំបាញ់បង្ហោះតែម្តង៕
មតិយោបល់