ភ្នំពេញ: ដោយមើលឃើញពីការរីកចម្រើនលើ ផ្នែកបច្ចេកវិទ្យា (អាយធី) នៅក្នុងប្រទេសកម្ពុជាកាន់តែមានការវិវឌ្ឍន៍ជឿនលឿន​ពីមួយថ្ងៃ​ទៅមួយថ្ងៃ ហើយវិស័យនេះអាចប្រឈមនឹងហានិភ័យនៅថ្ងៃក្រោយ ក្រុមហ៊ុនធំៗ២គឺ ខេអេចនិរន្ត KH NIRON INVESMENT Co.,ltd និង ក្រុមហ៊ុន LANTIUM មកពីសហរដ្ឋអាមេរិក បានចាប់ដៃគ្នាគ្រោងបោះទុនជាងកន្លះលានដុល្លារអាមេរិក ដើម្បីការពារការលួចចូលក្នុងទិន្នន័យកុំព្យូទ័រ នៅតាមក្រុមហ៊ុន ធនាគារ រោងចក្រ សហគ្រាស និងស្ថាប័នសំខាន់ៗរបស់រដ្ឋ។

លោកឧកញ្ញ៉ា ជា លាងហុង ប្រធានក្រុមហ៊ុនខេអេចនិរន្ត ដែលប្រតិបត្តិការលើផ្នែកអចលន:ទ្រព្យធំៗក្នុងប្រទេសកម្ពុជាបានមានប្រសាសន៍នៅក្នុងសន្និសីទសារព័ត៌មាន នៅរសៀលថ្ងៃទី០៧ខែកញ្ញានេះថា «ខ្ញុំបានមើលឃើញពីហានិភ័យផ្នែកបច្ចេកវិទ្យាហៅកាត់ថា អាយធីអាចនឹងកើតមាននាពេលអនាគត ដូចបណ្តាប្រទេសអភិវឌ្ឍន៍​នៅលើ​ពិភពលោកដែរ ដូច្នេះខ្ញុំក៏បានចាប់ដៃជាមួយលោក Jeff Middleton ប្រធានក្រុមហ៊ុន LANTIUM នឹងបង្កើតក្រុមហ៊ុនរួមគ្នា ដើម្បីការពារការលួចចូលទិន្នន័យ​ក្នុងកុំព្យូទ័រ​របស់ក្រុមហ៊ុន ធនាគារ និងស្ថាប័នរដ្ឋសំខាន់ៗជាច្រើនទៀតនៅពេលឆាប់ៗខាងមុខនេះ។

លោកបន្តថា LANTIUM ជាក្រុមហ៊ុនដែលមានបទពិសោធន៍វិនិយោគលើផ្នែកនេះជាង២០ឆ្នាំមកហើយនៅសហរដ្ឋអាមេរិក និងបានប្រតិបត្តិការនៅប្រទេសសឹង្ហបូរី ហើយក៏​ឈាន​មកដល់ប្រទេសកម្ពុជា នឹងអាចបន្តទៅប្រទេសវៀតណាម ថៃ និងប្រទេសមួយចំនួនទៀតនៅអាស៊ី។

លោក Jeff Middleton មានប្រសាសន៍ថា ដោយមើលឃើញប្រទេសកម្ពុជាមានការរីកចម្រើន មានកំណើនសេដ្ឋកិច្ចរឹងមាំ និងមានស្ថេរភាពនយោបាយ ហើយប្រជាជន​ចេះនិយាយ​ភាសារអង់គ្លេសច្រើន ពិសេសក្រុមហ៊ុន ខេអេចនិរន្ត ជាក្រុមហ៊ុនធំ មានវិជ្ជាជីវល្អ ដែលអាចបណ្តាក់ទុនរកស៊ីជាមួយគ្នាបាន។

លោកបន្តថា នេះជាពេលវេលាដ៏ត្រឹមត្រូវ ដែលលោកអាចមកបណ្តាក់ទុនរកស៊ី ព្រោះផ្នែកនេះមិនទាន់មានគេប្រតិបត្តិការនៅឡើយ ហើយកម្ពុជាអាចនឹងមានបញ្ហាប្រ​ឈមនឹង​ការចូលលួចទិន្នន័យច្រើននៅពេលខាងមុខ។ លើសពីនេះក្រុមហ៊ុនលោកចង់ជួយបង្កើនធនធានមនុស្ស ពិសេសយុវជន នៅក្នុងប្រទេសកម្ពុជាផងដែរ៕