នេះមិនមែនជារឿងលេងសើច ហើយក៏មិនមែនជារឿងដែលមិនគួរឲ្យជឿដែរ សម្រាប់ប្រទេសនេប៉ាល់ ដោយកាលពីថ្មីៗនេះ រដ្ឋាភិបាលនៃប្រទេសមួយនេះ បានបង្គាប់ទៅកាន់អាជ្ញាធរឲ្យបង្កើតនូវអត្តសញ្ញាណប័ណ្ណសម្រាប់មនុស្សភេទទី៣។
មន្ត្រីរដ្ឋាភិបាលនៃប្រទេសនេប៉ាល់បាននិយាយថា សម្រាប់ប្រជាពលរដ្ឋណា ដែលមិនចង់ប្រើភេទស្រី ឬប្រុសនោះ អាចប្រើប្រាស់នូវអត្តសញ្ញាណប័ណ្ណភេទទី៣បាន។
ទង្វើរបស់រដ្ឋាភិបាលមួយនេះ បានធ្វើឲ្យមហាជន និងប្រជាពលរដ្ឋជាច្រើនបានសាទរ និងបាននិយាយថា នេះជាការទទួលស្គាល់នូវសិទ្ធិសម្រាប់មនុស្សភេទទី៣។
លោក Bhola Siwakot រដ្ឋមន្ត្រីក្រសួងមហាផ្ទៃរបស់ប្រទេសនេប៉ាល់ បាននិយាយថា បទបញ្ជានៃការចេញអត្តសញ្ញាណប័ណ្ណសម្រាប់ភេទទី៣នេះ ត្រូវបានផ្សព្វផ្សាយទៅការិល័យគ្រប់ជាន់ថ្នាក់ទាំងអស់។
សកម្មជនមួយចំនួនបាននិយាយថា មនុស្សភេទទី៣ ពិបាករកការងារធ្វើខ្លាំងណាស់នៅក្នុងប្រទេសនេះ ហើយការស្នើសុំធ្វើលិខិតឆ្លងដែន ការចុះឈ្មោះចូលរៀន កាន់កាប់ទ្រព្យសម្បត្តិ គឺមិនអាចធ្វើបានឡើយ ព្រោះថាគ្មានអត្តសញ្ញាណប័ណ្ណ។
គួរបញ្ជាក់ផងដែរថា តុលាការកំពូលនៃប្រទេសនេប៉ាល់ បានចេញសេចក្ដីសម្រេចមួយកាលពីឆ្នាំ ២០០៧ ដោយឲ្យរដ្ឋាភិបាលនេប៉ាល់ ចេញអត្តសញ្ញាណប័ណ្ណសម្រាប់មនុស្សភេទទី៣ ដោយទុកពេលវេលា ៥ឆ្នាំ ក្នុងការអនុវត្តសេចក្ដីសម្រេចនេះ៕
ព័ត៌មានជាតិ
មតិយោបល់