ធ្វើដំណើរតាមផ្លូវជាតិលេខ ៥ រហូតដល់ផ្លូវបំបែកស្គន់បត់ស្តាំចូលផ្លូវជាតិលេខ ៧ គឺជាផ្លូវយុទ្ធសាស្ត្រដ៏សំខាន់ មួយដើម្បីចូលទៅកាន់ភូមិភាគឦសាន្តដែលមានខេត្ត ក្រចេះ ស្ទឹងត្រែង រតន:គីរី និងមណ្ឌលគីរី ។ ខេត្តក្រចេះ មានចម្ងាយផ្លូវ ៣១៥ គម ពីរាជធានីភ្នំពេញ ឆ្លងកាត់ខេត្ត កណ្តាល និងកំពង់ចាម ។ ស្ថិតនៅចម្ងាយ ១៥គម ពីក្រុងក្រចេះ រមណីយដ្ឋានកាំពី បានទាក់ទាញភ្ញៀវទេសចរជាតិ ដ៏ដូចជាអន្តរជាតិយ៉ាងច្រើនកុះករទៅទស្សនា សម្រស់ធម្មជាតិនៃទន្លេ មេគង្គ និងអាចងូចទឹកលេងកម្សាន្តបានយ៉ាងសប្បាយរីករាយផងដែរ ។ មកដល់ស្ពាន ព្រែកកាំពី លោកអ្នកនឹងឃើញទិដ្ឋភាពមូយដ៏ចម្លែកនោះ គឺផ្ទៃទឹកទន្លេមេគង្គទាំងមូលត្រូវពុះជ្រៀកជាចំណែក តូចៗដោយពំនូតកោះរាប់ម៉ឺនដែលមានរុក្ខជាតិទឹកដុះឡើងខៀវស្រងាត់ ។ នៅរដូវប្រាំមានភ្ញៀវទេសចរជាច្រើន ចូលចិត្តទៅទស្សនា និងងូតទឹកលេងកម្សាន្តនៅរមណីយដ្ឋានព្រែកកាំពី ដែលមានជម្រៅទឹក ចាប់បី ០,៥ម ដល់ ១ម ។ នៅទីនេះត្រូវបានរៀបចំឲ្យមានចំណតឡាន ម៉ូតូ ធំទូលាយ ព្រមទាំងមានតូបសំរាកជាច្រើន ដែលធ្វើឡើងពីឈើ ដោយឆ្លងកាត់ស្ពានតូចមួយរៀបចំដោយសមាគមកាំពី ហើយភ្ញៀវទេសចរត្រូវបង់ប្រាក់ ៥០០រៀល ។ ចំពោះតម្លៃជួលតូបវិញក្នុងថ្ងៃធម្មតា ១០០០០រៀល ប៉ុន្តែក្នុងថ្ងៃបុណ្យទានធំៗវិញ តម្លៃតូបជួលកើនដល់ ១ម៉ោង ១០០០០រៀល។
រមណីយដ្ឋានកាំពី ក៏មានរៀបចំជាសេវាកម្មម្ហូបអាហារ និងភេសជ្ជះជូនភ្ញៀវ ទេសចរដែលបានចូលទស្សនា ។ តំបន់កាំពីនេះក៏ជាជម្រកពូជត្រីធំៗ បើតាមអាជីវករនៅទីនេះបានប្រាប់ថា ត្រីក្អែកដែលមានទំហំប៉ុនភ្លៅមួយកំណាត់តម្លៃ ៣០០០០រៀល ។ នៅរដូវបុណចូលឆ្នាំប្រពៃណីចិននេះ ឃើញ ថាមានភ្ញៀវទេសចរចូលមកទស្សនារមណីយដ្ឋានកាំពីយ៉ាងច្រើនកុះករ ដែលពួកគាត់ទាំងនោះមកពីរាជធានី ភ្នំពេញ និងតំបន់ជុំវិញរមណីយដ្ឋាន ។
លោក យស គន្ធ ដែលជាភ្ញៀវទេសចរម្នាក់ដែលបានមកទស្សនា រមណីយដ្ឋានកាំពីបានប្រាប់ ដំណឹង ឲ្យដឹងថា គាត់ពិតមានភាពសប្បាយរីករាយណាស់ដែលនេះជាលើកដំបូង របស់គាត់បានមកទស្សនាតំបន់ទឹកហូរដល់ស្រស់ត្រកាលនៃទន្លេមេគង្គក្នុងខេត្តក្រចេះនេះ ។ រូបគាត់បានមក ពីភ្នំពេញ ជាមួយមិត្តភក្ររបស់គាត់ចំនួន ១២ រូបផ្សេងទៀត បានងូតទឹកយ៉ាងសប្បាយរីករាយ ព្រមទាំងផ្តិតយក រូបភាពធម្មជាតិនៃរមណីយដ្ឋានទុកជាអនុស្សាវរីយ៍ផងដែរ៕
មតិយោបល់