ការសិក្សាស្រាវជ្រាវមួយ បានសំយោគសេចក្ដី កាលពីថ្ងៃអង្គា ទី ២២ ខែសីហា ឆ្នាំ ២០១២ កន្លងទៅថ្មីៗនេះថា ការឱ្យថ្នាំដែលមានលក្ខណៈ ប្រឆាំងទៅនឹងជីវះ (អង់ទីប៊ីយ៉ូទីក antibiotiques) ទៅឱ្យទារកមានអាយុ តិចជាង ៦ ខែ ប្រើនៅថ្ងៃនេះ អាចនឹងបង្កឱ្យទារកនេះ មានរោគធាត់ចុកខ្លាញ់ នៅពេលធំឡើង។
អ្នកសហស្រាវជ្រាវម្នាក់ គឺលោក ឡេអូណាដូ ត្រាសានដេ (Leonardo Trasande) មកពីសកលវិទ្យាល័យ ញ៉ូយកនៃសហរដ្ឋអាមេរិក បានគូសបញ្ជាក់ថា «យើងធ្លាប់តែបានគិតថា រោគធាត់ចុកខ្លាញ់ មានកើតតែនៅលើមនុស្សធំ នៅពេលដែលមនុស្សនោះ ទទួលទានអាហារច្រើនជ្រុល និងមិនធ្វើកីឡាឱ្យបានគ្រប់គ្រាន់។ តែការសិក្សាស្រាវជ្រាវ កាន់តែច្រើនឡើងៗ បានពន្យល់ថា វាមានភាពស្មុគ្រស្មាញ ជាងអ្វីដែលយើងគិតនេះទៀត។»
លោកបានបន្ថែមថា «អង្គការពារដែលមានវត្តមាន នៅក្នុងពោះវៀនរបស់មនុស្សយើង វាអាចដើរតួយ៉ាងសំខាន់ នៅក្នុងបរិបទ មួយ ខណៈពេលដែលយើងស្រូបយកថាមពល (កាឡូរី)។ តែការលេបចូលទៅក្នុងពោះ នូវប្រភេទថ្នាំ អង់ទីប៊ីយ៉ូទីក នេះ វានឹងអាចសម្លាប់អង្គការពារទាំងនោះ ដែលមានឥទ្ធិពលយ៉ាងខ្លាំង ក្នុងការទប់ កាឡូរី ដែលមាននៅក្នុងអាហារ នៅពេលដែលយើងញ៉ាំចូលទៅក្នុងខ្លួន។ ម្យ៉ាងទៀត អង្គការពារទាំងនោះ នឹងអនុញ្ញាតិឱ្យយើងគ្រប់រូបនៅរក្សារូបរាង បាន ស្គមល្អ។»
បណ្ដាអ្នកសិក្សាស្រាវជ្រាវ បានពិសោធន៍ និងពិនិត្យករណីនេះ ទៅលើទារក ចំនួន ១១,៥៣២ នាក់ ដែលទើបនឹងចាប់កំណើត នៅទីក្រុង អេវុន (Avon) ប្រទេសអង់គ្លេស កាលពីឆ្នាំ ១៩៩១ និង ១៩៩២ កន្លងទៅ។ អ្នកស្រាវជ្រាវ បានរកឃើញថា ទារកអាយុតិចជាង ៥ ខែ ដែលបានទទួលថ្នាំ អង់ទីប៊ីយ៉ូទីក បានឡើងទម្ងន់រីកមាឌខ្លាំង និងច្រើនជាង បើប្រៀបធៀបទៅនឹងកុមារផ្សេងទៀត ដែលមិនបានប្រើថ្នាំប្រភេទនេះ។
អ្នកចិញ្ចឹមគោ បានប្រើប្រាស់ ថនាំប្រភេទនេះ ដើម្បីឱ្យគោធាត់
បើទោះបីជាមានការខុសគ្នាថា មានការឡើងទម្ងន់ មានទំហំតិចតួច រវាងពី ១០ ខែ ទៅ ២០ ខែក៏ដោយ ក៏ការឡើងទម្ងន់នេះ មានភាពគួរឱ្យកត់សម្គាល់ នៅពេលកុមារមានអាយុ ៣ ឆ្នាំ និង ២ ខែ។ ជាពិសេសមកដល់អាយុនេះ កុមារដែលទទួលការព្យាបាល ជាមួយនឹងប្រភេទថ្នាំ អ៊ង់ទីប៊ីយ៉ូទីក នៅអំឡុងពេលទើបនឹងកើតពីពោះម្ដាយនេះ មានសង្ឃឹមថា នឹងអាចឡើងទម្ងន់ប្រមាណជា ២២% បន្ថែមទៀត។ តែសម្រាប់ទារកដែលមានអាយុលើសពី ៥ ខែ ហើយបានទទួលការប្រើប្រាស់ ថ្នាំប្រភេទនេះ គេមិនបានសង្កេតឃើញថា មានសកម្មភាពឡើងទម្ងន់ អ្វីខ្លាំងក្លាឡើយ។
អ្នកស្រាវជ្រាវម្នាក់ទៀត លោក ហ្សាង់ ប្លូស្តេន (Jan Blustein) មកពីសកលវិទ្យាល័យ ញ៉ូយក ដូចគ្នា បានសង្កត់ធ្ងន់ថា «ជាយូរយារណាស់មកហើយ ដែលអ្នកចិញ្ចឹមគោដឹងថា ប្រភេទថ្នាំ អង់ទីប៊ីយ៉ូទីក មានសារសំខាន់ខ្លាំងណាស់ ក្នុងការ ធ្វើឱ្យគោធាត់ឡើងទម្ងន់ ដើម្បីលក់បានថ្លៃ និងចំណេញប្រាក់ បានច្រើននោះ។ បើទោះជាយើង ត្រូវបន្ថែមការសិក្សា ស្រាវជ្រាវណាផ្សេងទៀត ដើម្បីបញ្ជាក់ពីទិន្នន័យនេះក៏ដោយ ក៏ការសរុបលទ្ធផលក្នុងពេលនេះ បានបញ្ជាក់ថា ប្រភេទថ្នាំនេះ មានឥទ្ធិពលដូចគ្នា ទៅលើការធាត់ចុកខ្លាញ់ នៅក្នុងជីវិតមនុស្ស និងជាពិសេស នៅក្នុងជីវិតកុមារ»៕
https://i1272.photobucket.com/albums/y389/domneng/fat_child_729-420x0_zps2f321c8e.jpg
មតិយោបល់