ខេត្តកណ្តាល៖ សេក្តីរាយការណ៍ពីនគរបាលចរាចរណ៍ នៃអធិការដ្ឋាននគរបាលស្រុកកណ្តាលស្ទឹងបានឲ្យដឹងថា កាលពីវេលាម៉ោង៤និង៣០នាទីទាបភ្លឺ ថ្ងៃទី១៥ ខែមិថុនា ឆ្នាំ២០១៣ នៅចំណុចចន្លោះគីឡូម៉ែត្រលេខ២៧-២៨ ខាងមុខផ្សារព្រៃទទឹង ស្ថិតក្នុងភូមិព្រៃទទឹង ឃុំត្រពាំងវែង ស្រុកកណ្តាលស្ទឹង ខេត្តកណ្តាល មានករណីគ្រោះថ្នាក់ចរាចរដ៏រន្ធត់មួយបានកើតឡើង រវាងរថយន្តម៉ាកហ៊ីយ៉ាន់ដាយពណ៌ខៀវ ពាក់ស្លាកលេខភ្នំពេញ2F-7411 បើកបរដោយឈ្មោះ ឆេង ចាន់សាត ភេទប្រុស អាយុ២៧ឆ្នាំ មានទីលំនៅក្នុងភូមិពោធិ៍ ឃុំខ្វែវ ស្រុកសំរោងទង ខេត្តតាកែវ តាមបណ្តោយផ្លូវជាតិលេខ៣ ក្នុងទិសដៅពីជើងទៅត្បូង និងអ្នករួមដំណើរ៣នាក់ទៀតទី១-ឈ្មោះ កង ផល ភេទប្រុស អាយុ២៥ឆ្នាំ មានទីលំនៅក្នុងភូមិព្រៃនាងពួន ឃុំព្រះនិពាន ស្រុកសំរោង ខេត្តតាកែវ ទី២-ឈ្មោះ សៅ សុឃឿន ភេទប្រុស អាយុ៣០ឆ្នាំ នៅភូមិអូរជ្រៅ ឃុំបឹងជ្រាវ ស្រុកស្រែអំបិល ខេត្តកោះកុង ទី៣-ឈ្មោះ ហ៊ី ឈៀងហេង ភេទប្រុស អាយុ១៨ឆ្នាំ មានទីលំនៅភូមិព្រៃនាងពួន ឃុំព្រះនិពាន ស្រុកសំរោង ខេត្តតាកែវ បានបើកជ្រុលទៅបុកគូថរថយន្តមួយគ្រឿងទៀតមិនស្គាល់ម៉ាក ដែលបានឈប់ចតស្ងៀមនៅលើកំណាត់ផ្លូវជាតិលេខ៣។
មន្ត្រីនគរបាលចរាចរណ៍ដដែលបានបន្តថា នៅក្នុងករណីគ្រោះថ្នាក់ចរាចរខាងលើនេះបានបណ្តាលឲ្យជនរងគ្រោះ៤នាក់ ដែលជិះនៅក្នុងកាប៊ីនរថយន្តម៉ាកហ៊ីយ៉ាន់ដាយពណ៌ខៀវ ពាក់ស្លាក់លេខភ្នំពេញ2F-7411ស្លាប់ភ្លាមៗនៅកន្លែងកើតហេតុ ដោយសារតែកាប៊ីនរថយន្តកៀបជាប់។ ចំណែកឯរថយន្តធន់ធំដែលចតស្ងៀមត្រូវរថយន្តជនរងគ្រោះបុកគូថពីក្រោយនោះ ក្រោយពីកើតហេតុបានបើកគេចបាត់ស្រមោលតែម្តង។មន្ត្រីនគរបាលខាងលើបានបញ្ជាក់ ក្រោយពីមានហេតុការណ៍កើតឡើងសមត្ថកិច្ចនគរបាលចរាចរណ៍ស្រុកកណ្តាលស្ទឹង សហការជាមួយនគរបាលប៉ុស្តិ៍រដ្ឋបាលមូលដ្ឋានចុះទៅដល់កន្លែងកើតហេតុធ្វើការវាស់វែង និងធ្វើកំណត់ហេតុដកហូតវត្ថុតាងរថយន្តម៉ាកហ៊ីយ៉ាន់ដាយនាំយកមករក្សាទុកនៅអធិការដ្ឋាននគរបាលស្រុកកណ្តាលស្ទឹង ដើម្បីចាត់ការតាមនីតិវិធីច្បាប់។ រីឯសពជនរងគ្រោះទាំង៤នាក់ត្រូវបានសមត្ថកិច្ចនគរបាល ធ្វើការទំនាក់ទំនងទៅក្រុមគ្រួសារឲ្យមកទទួលយកទៅធ្វើបុណ្យតាមប្រពៃណីរៀងៗខ្លួន៕
ប្រភព៖ អគ្គស្នងការដ្ឋាននគបាលជាតិ
មតិយោបល់