នៅមុននេះក្រុមហ៊ុនវិភាគទៅលើទីភ្នាក់ងារផ្សព្វផ្សាយពាណិជ្ជកម្ម បាននិយាយថា ប្រាក់ចំណូលរបស់ Facebook ដែលបានមកពីការផ្សព្វផ្សាយពាណិជ្ជកម្មអាចនឹងធ្លាក់ចុះនៅក្នុងត្រីមាសទី២ ដោយឡែកកាលពីម្សិលមិញនេះ Facebook បានប្រកាសបង្ហាញប្រាក់ចំណូលត្រីមាសទី២ ឃើញថាប្រាក់ចំណូលដែលបានមកពីការផ្សព្វផ្សាយពាណិជ្ជកម្មលើទូរស័ព្ទចល័តមានការកើនឡើងខ្ពស់។
ក្រុមហ៊ុន Facebook បានប្រកាសឲ្យដឹងថា ប្រាក់ចំណូលនៅក្នុងត្រីមាសទី២ មានចំនួន ១,៨១ពាន់លានដុល្លារអាមេរិក កើនឡើង ៥៣ភាគរយ ដែលក្រុមអ្នកវិភាគបានរំពឹងថា មានត្រឹមតែ១,៦២ពាន់លានដុល្លារអាមេរិកប៉ុណ្ណោះ។ អ្វីដែលធ្វើឲ្យ Facebook សប្បាយចិត្តនោះគឺដោយសារតែប្រាក់ចំណូលដែលបានមកពីការផ្សព្វផ្សាយ ពាណិជ្ជកម្មនៅលើទូរស័ព្ទចល័តបានកើនឡើងរហូតដល់ ៤១ភាគរយ បើធៀបនឹងឆ្នាំ២០១២។ ព្រមជាមួយគ្នានោះ ក្រុមហ៊ុន Facebook ក៏បានបង្ហើបឲ្យដឹងថាផងដែរថា ក្នុងមួយថ្ងៃមានអ្នកប្រើ Facebook កើនឡើងដល់ ៦៩៩លាននាក់ ដែលកើនឡើង ២៧ភាគរយ បើធៀបនឹងឆ្នាំមុន ចំណែកចំនួនអ្នកប្រើជារៀងរាល់ខែវិញបានកើនឡើងដល់ ១,១៥ពាន់លាននាក់ កើនឡើង ២១ភាគរយ បើធៀបនឹងឆ្នាំមុន៕
មតិយោបល់