យោងតាមសារព័ត៌មាន Channel News Asia បានឲ្យដឹងនៅថ្ងៃចន្ទថា ស្ត្រីពាណិជ្ជករចិនម្នាក់ ត្រូវបានចោទប្រកាន់ពាក់ព័ន្ធនឹងករណីរបស់រដ្ឋមន្ត្រីអយស្ម័យយានចិន ដែលបានដកហូតមុខតំណែង ប្រឈមការចោទប្រកាន់ពីបទធ្វើពាណិជ្ជកម្មខុសច្បាប់ដែលមានទឹកប្រាក់សរុបចំនួន ២៩ ពាន់លានដុល្លារដុល្លារអាមេរិក ដែលជាការប្រព្រឹត្តិអំពើកពុករលួយដ៏ធំជាងពេលមុនគេនៅក្នុងប្រទេស។
Channel News Asia បានដកស្រង់សម្តីក្រុមរដ្ឋអាជ្ញា ដែលបានចុះផ្សាយតាមរយ: កាសែត China Daily ថា អ្នកស្រី Ding Shumiao ជាពាណិជ្ជករចិន នឹងប្រឈមការវិនិច្ឆយទោសនៅទីក្រុងប៉េកាំងពីបទប្រព្រឹត្តអំពើពុករលួយ និងការធ្វើពាណិជ្ជកម្មខុសច្បាប់ បន្ទាប់ពីស្ត្រីពាណិជ្ជករម្នាក់នេះ បានធ្វើអន្តរាគមន៍ក្នុងការដេញថ្លៃគម្រោងរថភ្លើងជាច្រើនគម្រោង។
កាសែតរបស់ចិននេះ បាននិយាយថា អ្នកស្រី Ding Shumiao ត្រូវបានចោទប្រកាន់ពីបទប្រគល់លុយជាង៤៩លានយ័នទៅឲ្យលោក Liu Zhijun និងត្រូវបានចោទប្រកាន់ពីបទជួយរកស្រីឲ្យគាត់ដើម្បីរួមភេទ ហើយ លោក Liu Zhijun បានជួយអ្នកស្រី Ding Shumiao ឲ្យដេញថ្លៃឈ្នះគម្រោងធ្វើផ្លូវរថភ្លើងជាង ៥០គម្រោង។
លោក Liu Zhijun អតីតរដ្ឋមន្ត្រីអយស្ម័យយានដែលត្រូវបានដកហូតតណែង ត្រូវបានកាត់ទោសប្រហារជីវិតកាលពីខែកក្កដា ប៉ុន្តែក្រោយមកទោសប្រហារជីវិតនោះ ត្រូវបានផ្អាក។ លោក Liu Zhijun ត្រូវបានចោទប្រកាន់ពីបទទទួលលុយ សំណូកចំនួន៦៤,៦ លានយ័នដែលជាប់ទាក់ទៅនឹងកិច្ចសន្យានៃគម្រោងរថភ្លើងនេះ៕
មតិយោបល់