ទីក្រុង Rio De Janeiro ( 11/09/13 ) : គណកម្មាការទំនាក់ទំនងការបរទេសរបស់រដ្ឋាភិបាលប្រេស៊ីលបានយល់ព្រមលើលិខិតអញ្ជើញមួយកាលពីថ្ងៃពុធក្នុងការបើកឲ្យមានការជួបគ្នាមួយរវាងអតីតអ្នកធ្វើការឲ្យក្រុមស៊ើបការណ៍សម្ងាត់របស់អាមេរិក Edward Snowden ដែលកំពុងទទួលសិទ្ធិជ្រកកោនបណ្តោះអាសន្ននៅក្នុងប្រទេសរុស្ស៊ី។
បើទោះបីជាលិខិតនោះត្រូវបានឆ្លងកាត់និងផ្តើមគំនិតដោយក្រុមអ្នកបង្កើតច្បាប់របស់ប្រេស៊ីលក៏ពិតមែនតែនៅមិនទាន់មានការយល់ព្រមណាមួយដែលចេញជាផ្លូវការពីសំណាក់ក្រសួងការបរទេសរបស់ប្រេស៊ីលឬរុស្ស៊ីនៅឡើយ។
ការទទួលបានព័ត៌មានថ្មីៗបន្តបន្ទាប់គ្នាពីការដែលអាមេរិកបានប្រើប្រាស់សមត្ថភាពក្រុមស៊ើបការណ៍របស់ខ្លួនទៅលើក្រុមមេដឹកនាំប្រេស៊ីលដែលក្នុងនោះក៏មានលោកប្រធានាធិបតីប្រេស៊ីលផងនោះវាបានធ្វើឲ្យប្រទេសប្រេស៊ីលមានការថ្នាំងថ្នាក់ជាមួយនឹងអាមេរិកយ៉ាងខ្លាំង។គួរបញ្ជាក់ថាព័ត៌មានភាគច្រើនដែលទទួលបានពីលោក Snowden ដែលកំពុងមានវត្តមាននៅប្រទេសរុស្ស៊ីនៅឡើយ។
មានការបញ្ជាក់ថាការស្នើរសុំជួបនេះគឺក្នុងគោលបំណងដើម្បីឲ្យមានការពិភាក្សាបង្កើតទំនាក់ទំនងរវាងប្រេស៊ីលជាមួយនឹង Snowden ក្នុងការស្វែងយល់បន្ថែមពីកម្មវិធីដែលរដ្ឋាភិបាលទីក្រុងវ៉ាស៊ិនតោនកំពុងធ្វើការឃ្លាំមើលពិភពលោក។
លោកបារ៉ាក់អូបាមាប្រធានាធិបតីអាមេរិកធ្លាប់បានសន្យាក្នុងការឆ្លើយតបទៅលើសំនួរដែលប្រេស៊ីលចោទសួរពីករណីលួចស៊ើបការណ៍ទៅលើប្រទេសប្រេស៊ីលឲ្យបានត្រឹមថ្ងៃពុធនេះ៕
មតិយោបល់