នៅថ្ងៃអាទិត្យ ទី២៩ ខែកញ្ញា ម្សិលមិញនេះ ទីភ្នាក់ងារអង្គការសហប្រជាជាតិ ក្នុងប្រទេសវៀតណាម បានឲ្យដឹងថា ប្រទេសវៀតណាម មានមនុស្សប្រហែល ១០០នាក់ បានស្លាប់ជារៀងរាល់ឆ្នាំ ដោយសារជំងឺឆ្កែឆ្គួត ច្រើនជាង ៩០ភាគរយ នៃករណីស្លាប់ដោយសារតែជំងឺនេះ បណ្តាលមកពីការគ្មានថ្នាំចាក់ វ៉ាក់សាំងការពារ ។
យោងតាមទីភ្នាក់ងារសារព័ត៌មានចិន ស៊ិនហួ បានឲ្យដឹងថា ការិយាល័យអង្គការកសិកម្ម និងស្បៀងអាហារ នៃអង្គការសហប្រជាជាតិ និងអង្គការសុខភាពពិភពលោក ក្នុងប្រទេសវៀតណាម បាននិយាយថា ជាងមួយទសវត្សរ៍កន្លងទៅនេះ ចំនួនអ្នកស្លាប់ដោយសារជំងឺឆ្កែឆ្គួត ចេះតែកើនឡើងក្នុងប្រទេសវៀតណាម ពី ៣៤នាក់ នៅក្នុងឆ្នាំ២០០៣ ទៅដល់កម្រិតខ្ពស់បំផុតចំនួន ១៣១នាក់ កាលពីក្នុងឆ្នាំ២០០៧ ។
ជំងឺឆ្កែឆ្គួត គឺត្រូវបានចាត់ទុកថាជា ជំងឺមានការធ្វេសប្រហែសមួយ ដែលជាផលប៉ះពាល់ ភាគច្រើនចំពោះប្រជាជនដែលងាយរងគ្រោះ ក្នុងនោះរួមមានប្រជាពលរដ្ឋក្រីក្ររស់នៅ តំបន់ជនបទ ដែលមិនបានទទួលព័ត៌មាន ហើយនិងសេវាសុខភាពត្រឹមត្រូវ។ គ្រប់ករណីមនុស្សដែលកើតជំងឺនេះ ត្រូវបានគេរាយការណ៍ រហូតមកដល់ពេលនេះ ក្នុងប្រទេសវៀតណាមក្នុង ឆ្នាំ២០១៣ ជាទូទៅបានបណ្តាលឲ្យ មនុស្សស្លាប់ ដោយសារតែ ការបរាជ័យក្នុងការស្វែងរក ការធ្វើការពន្យល់ជាសាធារណៈ មុននៃវិធីការពារជំងឺប្រភេទនេះ។
ក្នុងប្រទេសវៀតណាម ភាគច្រើននៃករណីកើតជំងឺឆ្កែឆ្គួតនេះ កើតមានឡើងនៅតំបន់ភាគខាងជើងប្រទេស ហើយនិងខេត្តនៅតាមតំបន់ភ្នំ។ មូលហេតុសំខាន់នៃការកើនឡើងចំនួន ករណីមនុស្សកើតជំងឺនេះ ជាងប៉ុន្មានឆ្នាំកន្លងទៅនេះ រួមមានការយល់ដឹងជាសាធារណៈ នៅមានកម្រិតទាបអំពីជំងឺនេះ និងវិធានការក្នុងការ ការពារខ្លួន ការគ្រប់គ្រងមិនល្អនៃសត្វឆ្កែ ចំនួនដ៏ច្រើននៃសត្វឆ្កែដែលគ្មានម្ចាស់ ព្រមទាំងគ្មានថ្នាំចាក់វ៉ាក់សាំង ការពារ៕
មតិយោបល់