​យោង​តាម​គេហទំព័រ Ubergizmo ចុះផ្សាយ​នៅ​ថ្ងៃ​ព្រហស្បតិ៍ ម្សិលមិញ​នេះ បានឲ្យដឹងថា ក្រុមហ៊ុន Nokia និង​ក្រុមហ៊ុន HTC កំពុងតែ​សំងំ​ផលិត Windows Phone ដែល​អាច​ប្រើប្រាស់​ស៊ីម​កាត់​បាន​ពីរ​។​

​នេះ​ជា​ព័ត៌មាន​ដ៏​គួរឲ្យភ្ញាក់ផ្អើល​មួយ​សម្រាប់​អតិថិជន HTC ជាពិសេស​គឺ Nokia ព្រោះ​ថា​ក្រុមហ៊ុន​ផលិត​ទូរស័ព្ទដៃ​ហ្វាំង​ឡ​ង់​មួយ​នេះ មិន​ធ្លាប់​ផលិត​ស្មា​ត​ហ្វូន Windows Phone ស៊ីម​ពីរ​នោះទេ​។​

​ប្រភព​ខាងលើ​បានបញ្ជាក់​ថា ក្រុមហ៊ុន​ទាំង​ពីរ​នេះ បាន​ចាប់យក Windows Phone ស៊ីម​ពីរ ធ្វើ​ជា​កូនសោរ​ថ្មី​សម្រាប់​ប្រជែង​ទីផ្សារ ប៉ុន្តែ​ពេល​វេលា​នៃ​ការ​បង្ហាញខ្លួន​នៅ​មិនទាន់​ដឹង​នោះ​ទេ​។​

​គេ​មិនដឹង​ច្បាស់​ថា HTC នឹង​ទទួលបាន​ភាពជោគជ័យ​ឬ​មួយ​យ៉ាងណា​នោះ​ទេ​សម្រាប់​ទីផ្សារ​ស្មា​ត​ហ្វូន​មួយនេះ ប៉ុន្តែ​សម្រាប់ Nokia វិញ ប្រាកដ​ច្បាស់​ជា​ទទួលបាន​នូវ​ភាពជោគជ័យ ព្រោះថា បច្ចុប្បន្ន Nokai បាន​ទទួល​ភាពជោគជ័យ​រួចមក​ហើយ​លើ​ការផលិត​ទូរស័ព្ទដៃ​ស៊ីម​ពីរ និង​ស្មា​ត​ហ្វូន Windows Phone​។​

​គួរ​បញ្ជាក់​ផង​ដែរ​ថា Nokia Lumia 520 បាន​ធ្វើ​ឲ្យ​ទីផ្សារ Windows Phone ងើបឡើង​យ៉ាងខ្លាំង ជា​ពិសេស​បាន​ធ្វើឲ្យ​ក្រុមហ៊ុន Nokia ទទួលបាន​ភាពជោគជ័យ​៕​