​ក្រុមហ៊ុន Apple បាន​បញ្ជាក់​នៅ​ក្រោយពេល​ចេញលក់ iPhone 5C និង iPhone 5S ថា ខ្លួន​លក់បាន iPhone ថ្មី​ចំនួន ៩​លាន​គ្រឿង​ត្រឹម​រយៈពេល​៣​ថ្ងៃ ដោយ​នៅ​ក្នុង​នោះ iPhone 5S លក់បាន ៧​លាន​គ្រឿង និង iPhone 5C ចំនួន ២​លាន​គ្រឿង ប៉ុន្តែ​នៅពេល​នេះ បែរ​ជា​ធ្លាយ​ព័ត៌មាន​ថា Apple កាត់បន្ថយ​ចំនួន​នៃ​ការផលិត iPhone 5C ពាក់កណ្ដាល​ទៅវិញ​។​

​យោង​តាម​សារព័ត៌មាន​ថ្មី​មួយ​បានឲ្យដឹងថា ក្រុមហ៊ុន Apple បាន​ធ្វើ​ការកាត់បន្ថយ​ការផលិត iPhone 5C ពាក់កណ្ដាល​គឺ​ពី ៣០០.០០០​គ្រឿង​មក​នៅត្រឹម ១៥០.០០០​គ្រឿង​។​

​គ្មាន​ហេតុផល​ច្បាស់លាស់​ណាមួយ​បញ្ជាក់​ពី​ការកាត់បន្ថយ​ចំនួន​នៃ​ការផលិត​នេះឡើយ ប៉ុន្តែ​បើ​តាម​ការវិភាគ​ប្រហែល​មកពី iPhone 5C មិនមែនជា iPhone ដែល​ពេញនិយម ព្រមទាំង​មាន​តម្រូវការ​តិច​។​

​នៅ​មុនពេល iPhone 5C ចេញ​លក់​ជា​ផ្លូវការ គ្រប់​គ្នា​បាន​រំពឹងថា វា​អាច​ជា iPhone មួយ​ដែល​មាន​តម្លៃថោក ប៉ុន្តែ​ផ្ទុយទៅវិញ វា​មិន​ដូច​ការ​គិត​នោះ​ទេ​៕​