ទីក្រុងសេអ៊ូល៖មន្ត្រីរបស់រដ្ឋាភិបាលមួយរូបរបស់កូរ៉េខាងត្បូងបាននិយាយឲ្យដឹងកាលពីថ្ងៃព្រហស្បតិ៍ម្សិលមិញថាកូរ៉េខាងជើងមានផែនការនឹងដោះលែងមនុស្ស 6 នាក់ដែលពួកគេបានចាប់កាលពីលើកមុនមកឲ្យកូរ៉េខាងត្បូងវិញ។ផែនការនៃការដោះលែងនេះត្រូវបានធ្វើឡើងក្រោយដំណើរទស្សនកិច្ចជាផ្លូវការរបស់ក្រុមអ្នកច្បាប់របស់ប្រទេសកូរ៉េខាងត្បូងក្រោមគោលបំណងការបើកឡើងវិញរោងចក្រមួយនៅក្នុងកូរ៉េខាងជើង។
នៅក្រោយការទទួលបានសំបុត្រមួយច្បាប់ពីសំណាក់ក្រុមការងារកាកបាទក្រហមរបស់កូរ៉េខាងជើងដែលបានផ្ញើរទៅឲ្យកូរ៉េខាងត្បូងថាមនុស្សទាំង 6 នាក់ដែលត្រូវដោះលែងទៅវិញតាមច្រកព្រំដែន Panmunjom នៅថ្ងៃសុក្រនេះ កូរ៉េខាងត្បូងក៏បានរៀបចំខ្លួនក្នុងការទទួលយកមនុស្សទាំង 6 នាក់នោះមកវិញដែរហើយខ្លួនបានសន្យាថានឹងស៊ើបរកការពិតពីមូលហេតុដែលមនុស្សទាំងនោះបានលួចចូលទៅកូរ៉េខាងជើង។កូរ៉េខាងត្បូងមិនបានប្រកាសប្រាប់ព័ត៌មានសម្អិតនៃជនទាំង 6 នាក់នោះទេតែគ្រាន់តែដឹងថាពួកគេ 6 នាក់សុទ្ធតែជាបុរសវ័យពី 26 ទៅ 67 ឆ្នាំ។
គួរបញ្ជាក់ផងដែរថាបើយោងតាមច្បាប់ដែលបានចែងរបស់កូរ៉េខាងត្បូងបានបញ្ជាក់ថាជនណាដែលធ្វើដំណើរទៅកាន់កូរ៉េខាងជើងដោយមិនមានការអនុញ្ញាតិពីរដ្ឋាភិបាលកូរ៉េខាងត្បូងនឹងត្រូវទទួលទោសរហូតដល់ 10 ឆ្នាំ៕
មតិយោបល់