កម្ពុជា(២៧/១១/២០១៣)៖ពាណិជ្ជកម្មរវាងប្រទេសកម្ពុជា និងតំបន់ពាណិជ្ជកម្មពិសេសហុងកុង ត្រូវបានគេមើលឃើញថា កើនឡើង ១៩ភាគរយនៅក្នុងរយៈពេល ៩ខែដំបូងក្នុងឆ្នាំ២០១៣ នេះត្រូវអរគុណចំពោះទំនាក់ទំនងពាណិជ្ជកម្មភាគីដ៏រឹងមាំរវាងចិន និងកម្ពុជា។ នេះបើយោងតាមសម្ដីរបស់លោក Benjamin Chau នាយកប្រតិបត្តិរងនៃក្រុមប្រឹក្សាអភិវឌ្ឍន៍ពាណិជ្ជកម្មហុងកុង កាលពីថ្ងៃពុធកន្លងទៅនេះ។
នៅក្នុងចន្លោះខែមករាដល់ខែកញ្ញា ឆ្នាំនេះ តម្លៃពាណិជ្ជកម្មសរុបរវាងកម្ពុជានិងហុងកុងមានចំនួន ៧៦២លានដុល្លារអាមេរិក ដោយបានកើនឡើង ១៩ភាគរយ ធៀបនឹងរយៈពេលដូចគ្នាកាលពីឆ្នាំមុន។
នៅក្នុងរបាយការណ៍ក៏បានបញ្ជាក់ឲ្យដឹងផងដែរថា កម្ពុជាបាននាំចេញទៅកាន់ទីហុងកុងគិតជាទឹកប្រាក់មានចំនួន ៧៧លានដុល្លារអាមេរិក ដែលកើនឡើង ៥៦ភាគរយ ខណៈដែលហុងកុងនាំចេញមកកម្ពុជាមានទឹកប្រាក់ទំហំ ៦៨៥លានដុល្លារអាមេរិក កើនឡើង ១៦ភាគរយ ហើយនៅក្នុងនោះទំនិញដែលនាំចេញភាគច្រើនមានវត្ថុធាតុដើម សម្លៀកបំពាក់។
“ការពង្រីក ការអភិវឌ្ឍន៍ និងទីផ្សាររបស់កម្ពុជាគឺពិតជាសំខាន់ក្នុងការនាំចេញទៅកាន់ហុងកុង។ យើងសូមអរគុណដល់ទំនាក់ទំនងពាណិជ្ជកម្មយ៉ាងជិតស្និទ្ធរបស់ប្រទេសទាំងពីរនៅក្នុងរយៈពេលប៉ុន្មានឆ្នាំចុងក្រោយ”។ នេះបើយោងតាមសម្ដីរបស់លោក Chau ថ្លែងឲ្យដឹង។
លោកបានបន្តទៀតថា ដើម្បីទាញយកសក្ដានុពលរវាងប្រទេសទាំងពីរ យើងត្រូវបង្កើនកិច្ចខិតខំប្រឹងប្រែងរបស់យើងដើម្បីពង្រីកការផ្សព្វផ្សាយទំហំពាណិជ្ជកម្មទ្វេភាគីរបស់យើង។
លោកលឹម ហេង អនុប្រធានសភាពាណិជ្ជកម្មកម្ពុជាបានថ្លែងថា ប្រទេសកម្ពុជា និងហុងកុងនៅតែជាចំណុចក្ដៅ ក្នុងការបង្កើនការទំនាក់ទំនងសេដ្ឋកិច្ច និងពាណិជ្ជកម្ម ដើម្បីជំរុញឲ្យហុងកុងបើកការិយាល័យតំណាងរបស់ខ្លួននៅក្នុងទីក្រុងភ្នំពេញ។
ហុងកុងគឺជាដៃគូពាណិជ្ជកម្មធំជាងគេលំដាប់ទី៦របស់កម្ពុជា និងជាប្រភពនៃការនាំចូលធំលំដាប់ទី៥។ បច្ចុប្បន្នរោងចក្រកាត់ដេរ និងស្បែកជើងចំនួន ៥៦ របស់ហុងកុងកំពុងតែប្រតិបត្តិការនៅក្នុងប្រទេសកម្ពុជា ដែលផ្តល់ឱកាសការងារដល់ប្រជាជនខ្មែរចំនួន ៣៥.០០០នាក់៕
លោក Benjamin Chau
មតិយោបល់