នាព្រឹក ថ្ងៃទី ២៥ ខែ ធ្នូ ឆ្នាំ ២០១៣ ក្រោម អធិបតីភាពដ៏ខ្ពង់ខ្ពស់ ឯកឧត្តម ប៉ា សុជាតិវង្ស អភិបាលនៃគណៈអភិបាលរាជធានីភ្នំពេញ ដោយមានការ ចូលរួមពីគ្រប់មន្ត្រីពាក់ព័ន្ធជុំវិញរាជធានីភ្នំពេញ អាជ្ញាធរខណ្ឌ-សង្កាត់ និងអង្គការសង្គមស៊ីវីលពាក់ព័ន្ធ ជាច្រើននាក់”ស្តីពីការកំណត់ភារកិច្ច និងយុទ្ធសាស្ត្រ កែលំអរការអនុវត្តការងារគ្រប់គ្រង និងការផ្តល់សេវាកម្មសម្រាម សំណល់រឹងនៅរាជធានីភ្នំពេញ” ។
ក្នុងអង្គសិក្ខាសាលានេះ ក្រុមមន្ត្រីជំនាញបានធ្វើបទបង្ហាញដល់អ្នក ចូលរួមទាំងអស់បានសិក្សា ស្វែងយល់ពីកិច្ចការមួយចំនួនដែលពាក់ព័ន្ធទៅ នឹងស្ថានភាពគ្រប់គ្រងសំណល់ក្នុងរាជធានីភ្នំពេញ ការឆ្ពោះទៅកែលំអប្រព័ន្ធ គ្រប់គ្រងសំណល់រឹងទីក្រុង និងការងារអនុវត្តគ្រប់គ្រងសម្រាម និងកិច្ច សហការជាមួយក្រុមហ៊ុនស៊ីនទ្រី ។
ព្រមជាមួយនោះក្រុមមន្ត្រីជំនាញក៏បានបង្ហាញពីបទពិសោធន៍ការងារគ្រប់គ្រងសំណល់នៅប្រទេសថៃ និង បទពិសោធន៍របស់អង្គការមូលនិធិអាស៊ីក្នុងការគ្រប់គ្រងសំណល់រឹងនៅប្រទេសសិរីលង្កា និងម៉ុងហ្គោលី ជូនដល់ អង្គសិក្ខាសាលាផងដែរ ។
ថ្លែងក្នុងឱកាសនោះ ឯកឧត្តម ប៉ា សុជាតិវង្ស អភិបាលរាជធានីភ្នំពេញ បាន គូសបញ្ជាក់ថា យើងទាំងអស់គ្នាជាអ្នកបង្កើតសម្រាម ហើយបើយើងមិនព្រមផ្លាស់ប្តូរ ឥរិយាបទ និងទំលាប់នៃការគិតគូរទុកដាក់ និងវេចខ្ចប់សម្រាម នោះទេ ទីក្រុងរបស់យើងនៅតែមិនបានស្អាតនោះឡើយ ។ ជាមួយគ្នានោះដែរ ឯកឧត្តម អភិបាលរាជធានីភ្នំពេញ បានណែនាំដល់អាជ្ញាធរខណ្ឌទាំង ៩ ត្រូវចាត់ឲ្យអភិបាលរង ខណ្ឌមួយរូបទទួលខុសត្រូវឲ្យច្បាស់លាស់លើបញ្ហាសម្រាម និងជាអ្នកសំរបសំរួលជាមួយ ក្រុមហ៊ុនប្រមូលសម្រាម រួមទាំងការពង្រឹងវិធានការណ៍ច្បាប់ ធ្វើយ៉ាងណាជំរុញឲ្យប្រជា ពលរដ្ឋ ក៏ដូចជាអាជ្ញាធរខណ្ឌ-សង្កាត់ ចូលរួមមិនរាថយក្នុងការពង្រឹងការគ្រប់គ្រង និងផ្លាស់ប្តូរទម្លាប់មិនល្អ ដូចជា ការចោលសម្រាមពាសវាលពាសកាល ដែលធ្វើឲ្យប៉ៈពាល់ដល់បរិស្ថាន សោភ័ណ្ឌភាពទីក្រុងនិងសុខមាលភាពប្រជា ពលរដ្ឋក្នុងទីក្រុងជាដើម ។
ឯកឧត្តមអភិបាលរាជធានីភ្នំពេញសម្រាម គឺជាបញ្ហាមួយក្នុងរូបមន្ត (ផ្តុំបី ផ្តាច់ពីរ និងផ្តើមមួយ)ផ្តុំបី គឺមានការដោះស្រាយ បញ្ហាសណ្តាប់ធ្នាប់ចរាចរណ៍ បញ្ហាសម្រាម និងបញ្ហាលូ ដែលសាលារាជធានីភ្នំពេញ នឹងត្រូវខិតខំអនុវត្តឲ្យបានលទ្ធផលល្អក្នុង ឆ្នាំ ២០១៤ ខាងមុខនេះ ដោយ ត្រូវអនុវត្តវិធានការណ៍លំអិតដល់ថ្នាក់ភូមិ សង្កាត់និមួយៗ៕
មតិយោបល់