ភ្នំពេញ៖ គណៈកម្មការមូលបត្រកម្ពុជា បានអនុម័តឲ្យក្រុមហ៊ុនផ្គត់ផ្គង់សម្លៀកបំពាក់កីឡា ហ្គ្រេនធី្វន អ៊ិនធើណេសិនណល(ខេមបូឌា) ភីអិលស៊ី (Grand Twins International (Cambodia) Plc.) លក់មូលបត្រជាសាធារណៈលើកដំបូង(IPO)។
យោងតាមសេចក្ដីសម្រេចនៃកិច្ចប្រជុំគណៈកម្មការមូលបត្រកម្ពុជាលើកទី២៧ ដែលព្រឹត្តទៅកាលពីថ្ងៃទី០៩ខែមករា ឆ្នាំ ២០១៤ កន្លងទៅនេះបានឲ្យដឹងថា ក្រុមវាយនភណ្ឌកាត់ដេរ និងច្នៃម៉ូតសម្លៀកបំពាក់កីឡា ហ្គ្រេនធី្វន អ៊ិនធើណេសិនណល (ខេមបូឌា) ភីអិលស៊ី ត្រូវបានអនុញ្ញាតឲ្យ លក់មូលបត្រជាសាធារណៈលើកដំបូង។
គណៈកម្មការមូលបត្រកម្ពុជា បានពិភាក្សា និងវិភាគយ៉ាងល្អិតល្អន់លើសាវដាអាជីវកម្មរបស់ក្រុមហ៊ុន លើទិដ្ឋភាពហិរញ្ញវត្ថុ និងចំណេញភាព លើទិដ្ឋភាពអភិបាលកិច្ចសាជីវកម្ម ព្រមទាំងលើទិដ្ឋភាពគ្រប់គ្រងហានិភ័យរួចមក អង្គប្រជុំបានសម្រេច អនុញ្ញាត និងចុះបញ្ជីជាគោលការណ៍ នូវឯកសារផ្ដល់ព័ត៌មានរបស់ក្រុមហ៊ុនហ្គ្រេនធ្វីន។
គួរបញ្ជាក់ផងដែរថា ហ្គ្រេនធ្វីន ជាក្រុមហ៊ុនផ្គត់ផ្គង់សម្លៀកបំពាក់កីឡាសម្រាប់ម៉ាកល្បីៗដូចជា ក្រុមហ៊ុន Adidas Group , Reebook និងម៉ាក Taylor Made រួមទាំងក្រុមហ៊ុនផ្សេងជាច្រើនទៀត៕
មតិយោបល់