ភ្នំពេញ៖ រដ្ឋមន្ត្រីក្រសួងពាណិជ្ជកម្ម លោក ស៊ុន ចាន់ថុល បានឲ្យដឹងនៅថ្ងៃអង្គារម្សិលមិញនេះថា កម្ពុជានឹងសម្រេចបាននូវគោលដៅរបស់ខ្លួនក្នុងការនាំចេញអង្ករចំនួន ១លានតោន នៅក្នុងឆ្នាំ ២០១៥។
“ប្រទេសកម្ពុជាបាននាំចេញអង្ករជាង ៤០០.០០០តោន នៅក្នុងឆ្នាំ ២០១៣ ហើយនៅក្នុងរយៈពេល ២ឆ្នាំទៀត ដំណើរឆ្ពោះទៅរកគោលដៅ ខ្ញុំជឿជាក់ថានឹងបានសម្រេច”។ នេះជាសំដីរបស់លោករដ្ឋមន្ត្រី បានថ្លែងនៅក្នុងពិធីចុះហត្ថលេខា អនុសារណៈ យោគយល់គ្នារវាង ក្រុមហ៊ុនកូរ៉េ ដែលមានឈ្មោះថា Hanwha និងក្រុមហ៊ុន Amru rice។
ក្រោមកិច្ចព្រមព្រៀងនេះ ក្រុមហ៊ុនទាំងពីរនឹងធ្វើការរួមគ្នាក្នុងការនាំចេញអង្ករកម្ពុជាទៅកាន់ប្រទេសកូរ៉េខាងត្បួង និងបណ្ដាប្រទេសមួយចំនួននៅអាស៊ី។
លោក ស៊ុន ចាន់ថុល បានបន្ថែមទៀតថា អង្ករក្រអូបកម្ពុជាគឺល្បីខាងរសជាតិងឆ្ងាញ់ និងជាអង្ករល្អបំផុតដែលពិភពលោកកំពុងត្រូវការ។
ជាង ៨០ភាគរយនៃចំនួនប្រជាជននៅក្នុងប្រទេសកម្ពុជាគឺជាកសិករ ហើយកម្ពុជា ប្រមូលផលស្រូវបាន ប្រហែល ៩លានតោនក្នុងមួយឆ្នាំ។ ក្រៅពីការប្រើប្រាស់ ក្នុងស្រុក អង្ករប្រមាណ ៣លានតោន ត្រូវបាននាំចេញជារៀងរាល់ឆ្នាំ។
នៅក្នុងខែសីហា ឆ្នាំ២០១០ ប្រទេសកម្ពុជា បានកំណត់គោលដៅរបស់ខ្លួនក្នុងការនាំចេញអង្ករ ១លានតោននៅក្នុងឆ្នាំ ២០១៥។
បច្ចុប្បន្ន មានក្រុមហ៊ុន ៨៤ត្រូវបាននាំចេញអង្ករទៅកាន់ប្រទេស និងតំបន់ចំនួន ៦៦នៅជុំវិញពិភពលោក ហើយប្រទេសដែលទិញសំខាន់ជាគេមាន ប្រទេសបារាំង ប៉ូឡូញ ម៉ាឡេស៊ី ហូល្លង់ និងប្រទេសចិន៕
មតិយោបល់