សេអ៊ូល៖ កូរ៉េខាងត្បូង នៅថ្ងៃពុធម្សិលមិញនេះ បានប្រកាសឲ្យដឹងថា ខ្លួននឹងចំណាយលុយ ១,៥ពាន់លានដុល្លារអាមេរិក សម្រាប់គម្រោងសាងសង់ប្រព័ន្ធ 5G ដែលមានសមត្ថភាពអាចទាញយកភាពយន្តមួយរឿងពេញដោយប្រើរយៈពេលតែ១នាទី។
យោងតាមសារព័ត៌មាន Business Insider បានដកស្រង់នូវសំដីរបស់ ក្រសួងវិទ្យាសាស្ត្រថា កូរ៉េខាងត្បូងមានបំណងដើម្បីអនុវត្តន៍បច្ចេកវិទ្យា លឿងជាងសេវាកម្ម 4G នាពេលបច្ចុប្បន្នប្រមាណជាង ១.០០០ដង នៅក្នុងរយៈពេល ៦ឆ្នាំ។
ក្រសួងបាននិយាយថា “យើងជួយជំរុញកំណើនជាតិជាមួយនឹង 2G កាលពីឆ្នាំ ១៩៩០, 3G កាលពីឆ្នាំ ២០០០ និង 4G កាលពីឆ្នាំ ២០១០។ ឥឡូវនេះវាគឺជាពេលវេលាដើម្បីបង្ហាញ 5G”។
ក្រសួងក៏បានបន្ថែមទៀតថា “បណ្ដាលប្រទេសនៅអឺរ៉ុប ប្រទេសចិន និងសហរដ្ឋអាមេរិក បាននឹងកំពុងតែខិតខំប្រឹងប្រែងអភិវឌ្ឍន៍បច្ចេកវិទ្យា 5G ហើយយើងជឿជាក់ថានឹងមានការប្រកួតប្រជែងដ៏កាចសាហាវមួយនៅក្នុងទីផ្សារនេះនៅក្នុងរយៈពេលប៉ុន្មានឆ្នាំខាងមុខទៀត”។
យោងតាមសេចក្ដីប្រកាសបានឲ្យដឹងថា សេវាកម្ម 5G នឹងត្រូវដាក់ឲ្យប្រើប្រាស់បណ្ដោះអាសន្ននៅក្នុងឆ្នាំ ២០១៧ ហើយប្រើប្រាស់ចេញលេញនៅចុងឆ្នាំ ២០២០។
រដ្ឋាភិបាលសង្ឃឹមថានឹងអនុវត្តផែនការនេះជាមួយនឹងការវិនិយោគ និងកិច្ចសហប្រតិបត្តិការពីប្រតិបត្តិករដូចជាក្រុមហ៊ុនរគមនាគមន៍ SK Telecom និង Korea Telecom ក៏ដូចជាក្រុមហ៊ុនផលិតស្មាតហ្វូនក្រុមហ៊ុន Samsung និង LG៕
មតិយោបល់