ភ្នំពេញ៖ តំណាងធនាគាពិភពលោកទទួលបន្ទុកទឹកស្អាតប្រចាំអាស៊ីបូព៌ា បានរិះគន់ចំពោះបញ្ហាអនាម័យនៅក្នុងរាជធានីភ្នំពេញ ថានៅមិនទាន់មានលក្ខណៈល្អប្រសើរ។
លោក Charles M.Feinstein តំណាងធនាគាពិភពលោកទទួលបន្ទុកទឹកស្អាតប្រចាំអាស៊ីបូព៌ា បានជួបសំណេះសំណាលជាមួយលោក ប៉ា សុជាតិវង្ស អភិបាលនៃគណៈអភិបាលរាជធានីភ្នំពេញ ដើម្បីពិភាក្សាលើបញ្ហាប្រឈមមួយចំនួនដែលទាក់ទងទៅនឹងបញ្ហាផ្គត់ផ្គង់ទឹកស្អាត និងបញ្ហាអនាម័យក្នុងរាជធានីភ្នំពេញ។
នៅក្នុងកិច្ចសំណេះសំណាល លោក Charles M.Feinstein បានគូសបញ្ជាក់ថា ការផ្គត់ផ្គង់ទឹកស្អាតនៅក្នុងរាជធានីភ្នំពេញ គឺមានលក្ខណៈល្អប្រសើរ ប៉ុន្តែបញ្ហាអនាម័យនៅមិនទាន់បានល្អនៅឡើយទេ ជាក់ស្តែងនៅមាន ការបង្ហូរទឹកមិនស្អាត និងកាកសំណល់ចូល បឹង ទន្លេ ដែលងាយបង្ករផលប៉ះពាល់ដល់សុខភាពប្រជាពលរដ្ឋ ។ លោកបានបន្តទៀតថា បញ្ហាទាំងនេះ លោកនឹងយកទៅពិភាក្សាជាមួយក្រុមការងារ Worl Bank ដើម្បីពិនិត្យលទ្ធភាព ជួយដល់រាជធានីភ្នំពេញ ខណៈដែលធនាគាពិភពលោក ក៏កំពុងតែធ្វើការពិភាក្សាការងារមួយចំនួនជាមួយរាជរដ្ឋាភិ បាលកម្ពុជាដែរនោះ។
ឆ្លើយបទទៅនឹងការរិះគន់នេះ លោក អភិបាលក្រុង បានថ្លែងថា បញ្ហានេះសាលារាជធានីកំពុងតែមានចំណាត់ការ ប៉ុន្តែកំពុងតែធ្វើជាបណ្កើរៗទៅតាមជំហ៊ាន ដូចជាការជួសជុលលូ ប្រឡាយ ដើម្បីបញ្ជៀសការលិចនៅរដូវវស្សា។
គួរបញ្ជាក់ផងដែរថា បច្ចុប្បន្នមានការរអ៊ូរទាំជាច្រើនពាក់ព័ន្ធនឹងការទុកដាក់សំរាម និងការប្រមូល ជាពិសេសគឺបញ្ហាស្ទះចរាចរណ៍ និងលិចទឹកនៅរដូវភ្លៀងធ្លាក់៕
មតិយោបល់