ម៉ានីល៖ ចំនួនអ្នកស្លាប់ដោយសារតែរអិលបាក់ដី និងទឹកជំនន់នៅភាគខាងត្បូងប្រទេសហ្វីលីពីន បានកើនឡើង ៥៦នាក់។ នេះបើយោងតាមក្រុមប្រឹក្សាគ្រប់គ្រង និងកាត់បន្ថយគ្រោះ មហន្តរាយជាតិហ្វីលីពីន បានឲ្យដឹងនៅថ្ងៃសុក្រនេះ។
ទីភ្នាក់ងារព័ត៌មានចិន ស៊ិនហួ បានចុះផ្សាយដោយផ្អែកតាមការលើកឡើងរបស់ក្រុមប្រឹក្សាគ្រប់គ្រង និងកាត់បន្ថយ គ្រោះមហន្តរាយជាតិថា មនុស្សចំនួន ៨៣នាក់ បានរងរបួស និង១០នាក់ផ្សេងទៀត កំពុងបាត់ខ្លួន។
បំណាក់ដី និងទឹកជំនន់ បានកើតឡើងដោយសារតែ សម្ពាធត្រូពិក ឈ្មោះ លីងលីង ដែលនៅហ្វីលីពីន គេហៅថា អាហ្គាតុន បានធ្វើឲ្យខូចខាតគិត ជាទឹកប្រាក់ជិត ៨,៤៥លានដុល្លារអាមររិក ទាំងផលដំណាំ និងហេដ្ឋារចនាសម្ព័ន្ធ។
ការរំខានដោយគ្រោះធម្មជាតិនេះ បានប៉ះពាល់ដល់ គ្រួសារចំនួន ២៤០.៥២១គ្រួសារ ស្មើនឹង ១,១៣លាននាក់ ក្នុងនោះបណ្តាលឲ្យប្រជាជន ៣៧.៤១៥គ្រួសារ ស្មើនឹង ១៨១.២៣៣នាក់ ផ្លាស់ទីជំរក ទៅនៅមជ្ឈមណ្ឌលសម្រាប់ជនភៀសខ្លួន។
គួរបញ្ជាក់ផងដែរថា ទំនិញជំនួយសង្គ្រោះ គិតជាទឹកប្រាក់ចំនួន ៦០,៣៨លានប៉េសូ ស្មើនឹង ១,៣៣លានដុល្លារ អាមេរិក ក៏ត្រូវបានគេផ្តល់ទៅឲ្យគ្រួសារ ដែលរងផលប៉ះពាល់ទាំងនោះផងដែរ៕
មតិយោបល់