ទីភ្នាក់ងារចារកម្មរបស់អាមេរិក និងអង់គ្លេសបានសម្រេចចិត្តប្រើប្រាស់កម្មវិធីទូរស័ព្ទសម្រាប់តាមដានដោយសម្ងាត់ តាមរយៈកម្មវិធីហ្គេម Angry Birds និង Google Maps។ នេះបើយើងតាមការចុះផ្សាយរបស់ទីភ្នាក់ងារព័ត៌មានចិន ស៊ិនហួ។
យោងតាមការចុះផ្សាយរបស់កាសែតញូយ៉កថែម បានឲ្យដឹងថា ការអនុវត្តផែនការខាងលើកនេះ នឹងអនុញ្ញាតឲ្យទីភ្នាក់ងារស៊ើបអង្កេត រកព័ត៌មាននានា ទាក់ទងទៅនឹងទីតាំង អាយុ ភេទ និង ការស្វែង រកសេវាកម្មផ្លូវភេទផងដែរ។ ការសិក្សាអំពីរបៀបនៃការទទួលបាន ទិន្នន័យសម្ងាត់តាមរយៈទូរស័ព្ទដៃនេះ ត្រូវបានធ្វើឡើងដោយទីភ្នាក់ងារសន្តិសុខនៃប្រទេសមហាអំណាចទាំងពីរ ធ្វើឡើងតាំងពីឆ្នាំ ២០០៧ មកម្ល៉េះ។
លោក Edward Snowden អតីតសមាជិកទីភ្នាក់ងារសន្តិសុខជាតិអាមេរិក (NSA) ដែលអាមេរិកបានចោទថាជាជនក្បត់ និងកំពុងជ្រកកោននៅក្នុងប្រទេសរុស្ស៊ី បានរាយការណ៍ថា NSA ជាមួយនឹងទីស្នាក់ការកណ្តាលនៃផ្នែកទំនាក់ទំនងរដ្ឋាភិបាលនៃចក្រភពអង់គ្លេស បានសម្រេច រួមគ្នាតាមដាន និង ស្រង់យកទិន្នន័យតាមរយៈ ទូរស័ព្ទស្មាតហ្វូន តាំងពីឆ្នាំ២០០៧មក។
ទោះបីជាយ៉ាងណាក៏ដោយក្រុមហ៊ុនផលិតហ្គេម RAVIO របស់ប្រទេសហ្វាំងឡង់ ដែលបាន ផលិតហ្គេម Angry Birds បាននិយាយថា ខ្លួនមិនបារម្ភនោះទេ ព្រោះថាប្រព័ន្ធសុវត្ថិភាពនៃហ្គេមខ្លួនមានកម្រិតខ្ពស់ ហើយខ្លួនក៏សូមច្រានចោលផងដែរ ថាមិនបានចូលដៃជាមួយ NSA ឡើយ៕
មតិយោបល់