ទីក្រុងឡុងដ៍៖ រដ្ឋមន្ត្រីក្រសួងអន្តោប្រវេសន៍អង់គ្លេស បានលាលែងពីតំណែងក្រោយពេលដែលគេរកឃើញថា លោកបានជួលស្ត្រីបម្រើការងារនៅក្នុងផ្ទះជាជនអន្តោប្រវេសន៍ខុសច្បាប់។
លោក Mark Herper រដ្ឋមន្ត្រីក្រសួងអន្តោប្រវេសន៍ ដែលទំនងនឹងក្លាយជានាយករដ្ឋមន្ត្រីនាពេលអនាគត នាពេលនេះ បានលាលែងពីតំណែង ក្នុងរយៈពេល ២៤ម៉ោង ក្រោយពេលដែលគេរកឃើញថា គាត់បានជួលស្ត្រីបម្រើការងារនៅក្នុងផ្ទះ ជាជនអន្តោប្រវេសន៍ខុសច្បាប់ ហើយអាចនឹងត្រូវពិន័យ ៥ពាន់ផោនទៀតផង។
លោករដ្ឋមន្ត្រីរូបនេះ បាននិយាយថា លោកពិតជាសោកស្ដាយ ដែលលោកមិនបានពិនិត្យមើលឲ្យបានល្អទៅលើឯកសារដែលស្ត្រីនោះផ្ដល់ឲ្យ ដូច្នេះលោកត្រូវតែលាលែងពីតំណែងព្រោះថាលោកជារដ្ឋមន្ត្រីអន្តោប្រវេសន៍ បែបជាធ្វេសប្រហែសជួលជនអន្តោប្រវេសន៍ឲ្យមកនៅក្នុងផ្ទះខ្លួនទៅវិញ។
ពាក់ព័ន្ធនឹងការលាឈប់នេះ លោក David Cameron នាយករដ្ឋមន្ត្រីអង់គ្លេស បានត្រឹមតែពោលពាក្យសោកស្ដាយប៉ុណ្ណោះ។
គួរបញ្ជាក់ផងដែរថា រដ្ឋាភិបាលអង់គ្លេសបានចាត់តាំងអ្នកស្ត្រី Herriett Baldwin ឲ្យកាន់តំណែងរបស់លោក Harper ព្រោះថាអ្នកស្ត្រី Baldwin ជាមនុស្សមានសម្ព័ន្ធភាព និងជិតស្និទ្ធជាមួយលោក Harper៕
មតិយោបល់