កុមាកម្ពុជាពីរនាក់បានស្លាប់បាត់បង់ជីវិតដោយសារជំងឺផ្ដាសាយបក្សី H5N1 កាលពីថ្ងៃទី០៧ខែកុម្ភៈ ឆ្នាំ ២០១៤ កន្លងទៅនេះ។ នេះបើយោងតាមការចុះផ្សាយរបស់ AKP ។
យោងតាមសេចក្តីប្រកាសរួមរវាងក្រសួងសុខាភិបាល និងអង្គការសុខភាពពិភពលោក ចុះថ្ងៃទី ១២ ខែកុម្ភៈ ឆ្នាំ ២០១៤ ឲ្យដឹងថា កុមារា អាយុ ០៨ ឆ្នាំដែលមានទីលំនៅក្នុងភូមិក្បាលត្រាច ឃុំស្រែចា ស្រុកស្នួល ខេត្តក្រចេះ ត្រូវបានបញ្ជាក់ដោយវិទ្យាស្ថានប៉ាស្ទ័រកម្ពុជា កាលពីថ្ងៃទី ០៨ ខែកុម្ភៈ ឆ្នាំ ២០១៤ ថា មានជំងឺផ្តាសាយបក្សី H5N1 ។
ដោយសារស្ថានភាពសុខភាពរបស់កុមារ មានសភាពកាន់តែធ្ងន់ធ្ងរ កុមារានេះ ត្រូវបានដាក់ឲ្យសំរាក នៅមន្ទីរពេទ្យបង្អែកមេមត់នៅថ្ងៃទី ០៦ ខែកុម្ភៈ ឆ្នាំ ២០១៤ និងត្រូវបានបញ្ជូនទៅមន្ទីរពេទ្យខេត្តកំពង់ចាម នៅម៉ោង ១ ទៀបភ្លឺ បន្ទាប់ពីមានគ្រុនក្តៅ ឈឺ បំពង់ក ក្អក ឈឺពោះ ពិបាកដកដង្ហើម និងសន្លឹម និងត្រូវ ដាក់ឲ្យ សំរាកពេទ្យដោយទទួលបានការព្យាបាលដោយឱសថ Tamiflu នៅថ្ងៃទី ០៧ ខែកុម្ភៈ ។ ប៉ុន្តែ ទោះជាមានការយកចិត្តទុកដាក់ពីសំណាក់ក្រុមគ្រូពេទ្យក្តី ក៏កុមារបានស្លាប់នៅថ្ងៃទី ០៧ ខែ កុម្ភៈ ឆ្នាំ ២០១៤ នៅវេលា ម៉ោង ៦ ល្ងាច ។
សេចក្តីប្រកាសរួមនៅនិយាយថា ប្អូនស្រីកុមារអាយុ ០២ ឆ្នាំ នៅថ្ងៃទី ០១ ខែកុម្ភៈមាន រោគសញ្ញាប្រហាក់ ប្រហែល កុមារដែរ ហើយឪពុកម្តាយ បានស្វែងរកការព្យាបាលនៅគ្លីនិក ឯកជននៅក្នុងភូមិនៅថ្ងៃទី ០២ ខែកុម្ភៈ និងត្រូវបានដាក់ឲ្យសំរាកនៅមន្ទីរពេទ្យបង្អែកមេមត់ នៅថ្ងៃទី ០៦ ខែកុម្ភៈ ឆ្នាំ ២០១៤ និងបញ្ជូនបន្ត ទៅកាន់ម្ទីរពេទ្យខេត្តកំពង់ចាម នៅថ្ងៃទី ០៧ ខែកុម្ភៈជាមួយកុមារដែរ ។ នាងមានអាការៈមានគ្រុនក្តៅ ឈឺបំពង់ក ក្អក ឈឺពោះ រាក ពិបាក ដកដង្ហើម និងសន្លឹម ។ នាងមិនបានទទួលឱសថ Tamiflu ទេ ហើយបានស្លាប់នៅម៉ោង ៤ ព្រឹកថ្ងៃទី ០៧ ខែកុម្ភៈ ។ សេចក្តីប្រកាសរួមបានបញ្ជាក់ថា សំណាកមិនបាន បូមយកពីកុមារី នេះទេ ហេតុនេះយើងមិនបានធ្វើតេស្តរកវីរុសផ្តាសាយបក្សីទេ ។
ការស្លាប់របស់កុមារានេះ ជាករណីទី ២ ក្នុងឆ្នាំនេះ និងជាករណីទី ៤៩ ដែលបានឆ្លង វីរុសជំងឺផ្តាសាយបក្សី H5N1 ដែល ៣៧ ករណីក្នុងចំណោមករណីផ្តាសាយបក្សីទាំង ៤៩ ដែលកើតមានឡើងនៅ ព្រះរាជា ណា ចក្រកម្ពុជា កើតលើកុមារអាយុក្រោម ១៤ ឆ្នាំ និង ២៧ ករណីក្នុងចំណោមករណីផ្តាសាយបក្សីទាំង ៤៩ ជានារី ហើយមានតែ ១៥ ករណីមានជីវិត ចាប់តាំងពីមានជំងឺនេះលើកដំបូងនៅកម្ពុជាក្នុងឆ្នាំ ២០០៥ នោះ៕
មតិយោបល់