ហាណូយ(២៦/កុម្ភៈ)៖ ជំងឺគ្រុនផ្ដាសាយបក្សីបានប៉ះពាល់ខេត្ត-ក្រុងចំនួន ២១ នៅទូទាំងប្រទេសវៀតណាម ដោយមានមាន់ចំនួន ៦៤.០០០ក្បាលបានកើតជំងឺ។ នេះបើយោងតាមស្ថិតិចុងក្រោយបំផុតរបស់នាយកដ្ឋានសុខភាពសត្វ។
ទីភ្នាក់ងារព័ត៌មានវៀតណាម (VNA) បានរាយការណ៍ថា ការផ្ទុះឡើងវិញនៃជំងឺនេះត្រូវបានគេសន្មតថា មកពីមានការប្រែប្រួលនៃអាកាសធាតុនៅក្នុងរយៈពេល ២ខែដំបូងនៃឆ្នាំនេះ ហើយមួយវិញទៀតដោយសារតែមានដឹកជញ្ជូនមាន់នៅក្នុងឱកាសបុណ្យចូលឆ្នាំចិន-វៀតណាម។
ក្រសួង និងស្ថាប័នពាក់ព័ន្ធបានចាត់វិធានការទប់ស្កាត់កុំឲ្យជំងឺនេះរីករាលដាលតទៅទៀត ជាពិសេស នៅពេលនេះ អាជ្ញាធរនៅតាមច្រកព្រំដែនបានរឹតបន្តឹងក្នុងការដឹកជញ្ជូនបក្សី។
គួរបញ្ជាក់ផងដែរថា នៅក្នុងសេចក្ដីរាយការណ៍ពុំបានបញ្ជាក់ថា មានមនុស្សស្លាប់ដោយសារតែជំងឺផ្ដាសាយបក្សីនោះទេ សម្រាប់ឆ្នាំនេះ៕
មតិយោបល់