នៅអគារខណ្ឌរដ្ឋបាលព្រៃឈើព្រះវិហារកាលរសៀលថ្ងៃទី១៤ខែមិនាឆ្នាំ២០១៤មានរៀបចំធ្វើពិធីបិទវគ្គបណ្តុះបណ្តាលគម្រោងគ្រប់គ្រងព្រៃការពារតំបន់ត្រីកោណមរកត។ដែលមានសិក្ខាកាមជាមន្ត្រីរដ្ឋបាលព្រៃឈើ ចំនួន៣ប្រទេសចូលរួមនៅក្នុងវគ្គបណ្តុះបណ្តាលនេះក្រៅពីនេះក៏មានតំណាងសហរដ្ឋអាមេរិកនិងជប៉ុនចូលរួមផងដែរដើម្បីលើកកំពស់កិច្ចសហប្រតិបត្តិការអភិរក្សជីវចម្រុះតាម បណ្ដោយព្រំដែនថៃកម្ពុជាទ្បាវ។
ពិធីបើកវគ្គបណ្តុះបណ្តាលនេះបានធ្វើឡើងរយៈពេល៤ថ្ងៃចាប់ពីថ្ងៃទី១១ដល់ថ្ងៃទី១៤មិនាដែលខេត្ត ព្រះវិហារមានកិត្តិយសធ្វើជាម្ចាស់ផ្ទះ។ លោកទ្បុញប៉ុណ្ណារិទ្ធនាយរងផ្នែករដ្ឋបាលព្រៃឈើត្បែងមានជ័យនិងជាសិក្ខាកាមមួយរូបក្នុងវគ្គបណ្ដុះបណ្ដាលនេះបានអោយដឹងថាឆ្លងកាត់កម្មសិក្សារយះពេល៤ថ្ងៃមកនេះគឺបានផ្តល់នូវជំនាញនិងចំណេះដឹងល្អៗថ្មីៗបន្ថែមទៀតព្រោះយើងមានគ្រូបង្គោលមកបង្រៀននិងធ្វើបទបង្ហាញចំនួន០៥ប្រទេស។
លោកទ្បុញប៉ុណ្ណារិទ្ធបានគូសបញ្ចាក់សង្ខេបពីខ្លឹមសារមេរៀនក្នុងវគ្គបណ្ដុះបណ្ដាលនេះអោយបានដឹងថាជាទូទៅនិងជារួមប្រទេសនីមួយៗធ្វើបទបង្ហាញផ្តោតសំខាន់ទៅលើការរៀបចំផែនការគ្រប់គ្រងដីព្រៃឈើនៅតាម តំបន់ជីវចម្រុះព្រៃឈើត្រីកោណមរកតក្នុងរយះពេល១០ឆ្នាំខាងមុខទៀត។ការរៀបចំផែនការនេះដោយបាន បញ្ចូលទិន្នន័យគម្របព្រៃឈើដែលថតបានពីផ្កាយរណបរួចហើយបញ្ចូលទៅក្នុងប្រព័ន្ធGISដើម្បីធ្វើវិភាគពីកំរិតប្រែប្រួលគម្របដីព្រៃឈើ,ដីកសិកម្មនិងការរស់នៅរបស់មនុស្សតាមតំបន់ដីគម្របព្រៃឈើ។
លោកអ៊ិតភូម្រានាយខណ្ឌរដ្ឋបាលព្រៃឈើព្រះវិហារតំណាងអោយកម្ពុជាដែលធ្វើជាម្ចាស់ផ្ទះ បានមានប្រសាសន៍ថ្លែងអំណរគុណដល់ប្រទេសចំនួន៥ខាងលើដែលបានផ្ដល់កិត្តិយសដល់ខណ្ឌរដ្ឋបាលព្រៃឈើព្រះវិហារធ្វើជាម្ចាស់ផ្ទះរៀបចំបង្កើតអោយមានពិធីបើកវគ្គជាលើកដំបូងនេះនិងអរគុណផងដែរដល់អង្គការITTO និងJICAដែលបានជួយឧបត្ថម្ភថវិកាធ្វើអោយការបើកវគ្គបណ្តុះបណ្តាលរយះពេល៤ថ្ងៃមកនេះទទួលបាន លទ្ធផលល្អគួរឲ្យកត់សម្គាល់។
ចុងបញ្ចប់នៃពិធីលោកអ៊ិតភូម្រានាយខណ្ឌរដ្ឋបាលព្រៃឈើព្រះវិហារបានប្រគល់វិញ្ញាបនបត្រនិងវត្តុ អនុស្សាវរីយ៍បុរាណធ្វើអំពីប្រាក់ដល់គ្រូបង្គោលនិងសិក្ខាកាមទាំងអស់ព្រមទាំងបានចូលរួមដាំកូនឈើក្នុងបរិវេណខណ្ឌរដ្ឋបាលព្រៃឈើទុកជាកេរដំណែលនិងមិត្តភាពសំរាប់ប្រទេសនិមួយៗផងដែរ៕
មតិយោបល់