ភ្នំពេញ ៖ ក្រុមយុវជនជាកម្មករសំណង់និង ក្រុមយុវជនកាត់តែមម៉ូតូបានកាប់ចាក់គ្នាបន្ទាប់ពីផឹកស្រវឹងហើយទាស់សម្ដីគ្នាបណ្ដាលអោយយុវជនជាកម្មករសំណង់២នាក់របួសធ្ងន់ និងភាគីខាងកាត់តែមម៉ូតូរបួសធ្ងន់ម្នាក់ ដែលហេតុការណ៏នេះ កើតឡើងវេលាម៉ោង ១០និង ២៥នាទីយប់ថ្ងៃទី១៧ខែមីនាឆ្នាំ២០១៤ នៅក្នុង សួនឧទ្យានសុបិនចំការព្រីង ស្ថិតនៅក្នុង ភូមិច្រែស សង្កាត់ភ្នំពេញថ្មី ខណ្ឌសែនសុខ ។
តាមសាក្សីនៅកន្លែងកើតហេតុបានប្រាប់ឱ្យដឹងថា មុនឈានដល់ការប្រើហិង្សារហូតឈានទៅដល់ការកាប់ចាក់យ៉ាងអណាធិបតេយ្យនេះ ដំបូងឡើយគេបានឃើញក្រុមកម្មករសំណង់ដែលមាន គ្នាប្រមាណ៤ទៅ៥នាក់ បានអង្គុយផឹកស្រានៅក្នុងសួនឧទ្យានសុបិនចំការព្រីង តាំងពីល្ងាចម៉ោង ៥រហូតដល់យប់ជ្រៅអស់ស្រាចំនួន២ទៅ៣ដប។
សាក្សីបន្តថា នៅក្បែរក្រុមកម្មករសំណង់កំពុងផឹកស៊ី ក៏មានក្រុមយុវជនកាត់តែមម៉ូតូ បានផឹកស៊ីជាមួយក្រុមគ្នាគេនៅក្បែរនោះដែរ លុះដល់វេលាកើតហេតុគេឃើញយុវជនម្នាក់ នៅក្នុងក្រុមកាត់តែមម៉ូតូ ចេញមកហើយនិយាយឌឺដងដាក់ទៅក្រុមកម្មករសំណង់ថា” នៅកន្លែងនេះមានអាណាខ្លាំងខ្លះ?” ស្រាប់តែខាងក្រុមកម្មករសំណង់តបទៅ វិញថា “នៅកន្លែង នេះមិនមែន មានតែអ្នកឯងទេដែលខ្លាំងនោះ”។ គ្រាន់តែឌឺដងសំម្ដីដាក់គ្នាជាប់ភ្លាម យុវជនទាំង២ក្រុម ក៏បើកឆាកប្រយុទ្ធគ្នា ដោយភាគីខាងយុវជនកាត់តែម ម៉ូតូ ប្រើប្រាស់សុទ្ធតែដាវសាំម៉ូរ៉ៃ រី ឯភាគីខាងក្រុមកម្មករសំណង់វិញ គឺបានប្រើប្រាស់ដែកទីប និង ដំបងឈើជ្រុង។
បន្ទាប់ប្រយុទ្ធគ្នាចប់ គេឃើញភាគីទាំងពីរងរបួសធ្ងន់ រៀងខ្លួន ដោយ ភាគីខាង កម្មករសំណង់របួសធ្ងន់២នាក់ និង ភាគីខាងកាត់តែមម៉ូតូ រងរបួសធ្ងន់ម្នាក់។
ក្រោយពេលកើតហេតុ ជនរងគ្រោះត្រូវបានក្រុមគ្រួសារ បញ្ជូនទៅសង្គ្រោះនៅមន្ទីរពេទ្យ។ហើយសមត្ថកិច្ចបានបើកការស្រាវជ្រាវដើម្បីរកជន បង្កមកទទួលទោសទៅតាមផ្លូវច្បាប់៕
មតិយោបល់