កណ្ដាល ៖ រថយន្តកាមរីបាឡែន ពណ៌ស្ករមួយគ្រឿងម្ចាស់ស្រវឹងបានបើកក្នុងល្បឿនលឿនហើយរេចង្កូតទៅបុកចំរបាំងថ្មចែកទ្រូងផ្លូវបាក់អស់២កង់ ហើយរថយន្តព្យាមបើករត់បានប្រហែល៣គីឡូម៉ែត្ររថយន្តបែកកង់ទៅមុខលែងរួចក៏ត្រូវសមត្ថកិច្ចឃាត់ជាប់ កាលពីវេលាម៉ោង៨និង៣០នាទីយប់ថ្ងៃទី១៩ខែមិនាឆ្នាំ២០១៤ ត្រង់ចំណុចក្បែរក្លោងទ្វារវត្តបទុមសាគរ តាក្របៅ តាមបណ្ដាយផ្លូវជាតិលេខ២ ស្ថិតក្នុងភូមិដើមមាន សង្កាត់ដើមមាន ក្រុងតាខ្មៅ ខេត្តកណ្ដាល។
ប្រភពព័ត៌មានបានឲ្យដឹងថា នៅមុនពេលកើតហេតុគេបានឃើញរថយន្តកាមរីបាឡែនមួយគ្រឿង ពណ៌ស្ករ ពាក់ស្លាកលេខ ភ្នំពេញ 2Q-0563 បើកបរដោយបុរសម្នាក់ក្នុងល្បឿនលឿន តាមបណ្ដោយផ្លូវជាតិលេខ២ ទិសដៅពីជើងទៅត្បូង ទាំងស្ថានភាពស្រវឹង ខណ:មកដល់ចំណុចមុខមជ្ឈមមណ្ឌល វីធីស៊ី ស្ថិតក្នុងសង្កាត់ចក្រអង្រែក្រោម ខណ្ឌមានជ័យ រថយន្តក៏បានរេចង្កូតពន្លះរបាំងថ្មចែកទ្រូងផ្លូវបាក់អស់២កង់បណ្ដាលឲ្យរថយន្តរងការខូចខាតកង់ខាងមុខផ្នែកខាងឆ្វេង ហើយម្ចាស់រថយន្តព្យាយាមបើករថយន្តរត់គេចបានប្រហែល៣គីឡូម៉ែត្រ សំបកកង់រថយន្តខាងមុខផ្នែកខាងឆ្វេងបានរបូតចេញពីកង់សល់តែខ្នងដែកធ្វើឲ្យរថយន្តមិនអាចបន្តដំណើរតទៅមុខទៀតបានហើយត្រូវសមត្ថកិច្ចឃាត់ជាប់ ត្រង់ចំណុចកើតហេតុខាងលើក្បែរក្លោងទ្វារវត្តបទុមសាគរ តាក្របៅ ក្រុងតាខ្មៅ។
ក្រោយពេលកើតហេតុសមត្ថកិច្ចក៏បានឲ្យគេជួយប្ដូរកង់រថយន្តនិងបើករថយន្តយកទៅរក្សាទុកនៅអធិការដ្ឋាននគរបាលក្រុងតាខ្មៅដើម្បីរង់ចាំធ្វើការដោះស្រាយតាមផ្លូវច្បាប់៕
មតិយោបល់