លោក Mark Zuckerberg សហស្ថាបនិក និងជានាយកប្រតិបត្តិ Facebook បានថ្លែងឲ្យដឹងថា លោកបានប្រគល់ការងារថ្មីមួយទៅក្រុមអ្នកវិទ្យាសាស្ត្រក្នុងការបង្កើត និងផ្ដល់សេវាកម្មអ៊ីនធើណែតពីរយៈចម្ងាយ ពោលគឺពីលើមេឃមកកាន់ភពផែនដី ដោយប្រើប្រាស់នូវបច្ចេកវិទ្យាថ្មី។
នាយកប្រតិបត្តិរូបនេះ បានថ្លែងឲ្យដឹងផងដែរថា មានមនុស្ស និងអ្នកវិទ្យាសាស្ត្រជាច្រើនបានចូលរួមនៅក្នុងគម្រោងថ្មីនេះ ដោយក្នុងនោះមានអតីតសមាជិកអង្គការណាសា និងស្ថាប័នស្រាវជ្រាវខាងវិទ្យាសាស្ត្រជាច្រើនទៀត។
ព្រមជាមួយគ្នានោះ Facebook បានបង្ហើបឲ្យដឹងផងដែរថា ខ្លួនបានជួលមនុស្ស ៥នាក់មកពីក្រុមហ៊ុន Ascenta ដែលមានមូលដ្ឋាននៅក្នុងចក្រភពអង់គ្លេសសម្រាប់បង្កើតយន្តហោះដើរដោយពន្លឺព្រះអាទិត្យ ដែលអាចហោះហើរបានរយៈពេលយូរ។
Facebook ចង់យកយន្តហោះដែលប្រើពន្លឺព្រះអាទិត្យធ្វើជាតំបន់សម្រាប់ចែកចាយអ៊ីនធើណែត ហើយបើសិនជាផែនការនេះជោគជ័យនោះមានន័យថា អ៊ីនធើណែតនឹងធ្លាក់ពីលើមេឃ៕
មតិយោបល់