រាជធានីភ្នំពេញ ៖ រនាំងដែកពុះចែកទ្រូងផ្លូវបាក់ចំនួន៧ផ្ទាំងបានបាក់រប៉ាត់រប៉ាយពេញផ្លូវ ខណៈដែលបុរសម្នាក់ស្រវឹងស្រាធ្លាក់ភ្នែក បើករថយន្តម៉ាកតូយ៉ូតាកាមរី បាឡែន ពណ៌ស បុករះ កាលពីវេលាម៉ោង១០និង៣៥នាទីយប់ថ្ងៃទី៣០ខែមីនាឆ្នាំ២០១៤ តាមបណ្តោយមហាវិថីសហពន្ធ័រុស្ស៊ី ត្រង់ចំណុចមុខវិទ្យាល័យហ៊ុនសែន ១០០ខ្នង ស្ថិតនៅក្នុងសង្កាត់ទឹកថ្លា ខណ្ឌសែនសុខ។
ប្រភពព័ត៌មានពីសាក្សីដែលបានឃើញហេតុការណ៍បានឱ្យដឹងថា នៅមុនពេលកើតហេតុគេឃើញ រថយន្តមួយគ្រឿងម៉ាកតូយ៉ូតាកាមរី បាឡែន ពណ៌ស ពាក់ស្លាកលេខ ភ្នំពេញ 2U-0790 បើកបរដោយយុវជនម្នាក់ក្នុងស្ថានភាពស្រវឹងស្រាជោកជាំ ធ្វើដំណើរតាមបណ្តោយមហាវិថីសហពន្ធ័រុស្ស៊ី ក្នុងទិសដៅពីលិចទៅកើត មកដល់ចំណុចកើតហេតុ រថយន្តបង្កបានព្យាយាមវ៉ា រថយន្តមួយគ្រឿងទៀតនៅពីមុខ បណ្តាលឱ្យរថយន្តជ្រុលចង្កូត បុករនាំងដែកពុះចែកទ្រូងផ្លូវបាក់អស់ចំនួន០៧ផ្ទាំង បន្ទាប់ពីបង្កហេតុរថយន្តបង្កបានព្យាយាមបើករត់ បានប្រហែល២គីឡូម៉ែត្រ ដល់ចំណុចមុខក្រុមហ៊ុនតូយ៉ូតា ត្រូវបានសមត្ថកិច្ច និងប្រជាពលរដ្ឋដេញឃាត់បានទាំងរថយន្តនិងអ្នកបើកបរ។
ក្រោយពេលកើតហេតុសមត្ថកិច្ចធ្វើការវាស់វែង និងយកស្ទូចយករថយន្តបង្កទៅរក្សាទុកនៅការិយាល័យចរាចរជើងគោកនៃស្នងការដ្ឋាននគរបាលរាជធានីភ្នំពេញដើម្បីធ្វើការដោះស្រាយតាមផ្លូវច្បាប់៕
មតិយោបល់