ភ្នំពេញ ៖ បុរស២នាក់ស្រវឹងស្រាជិះម៉ូតូមួយគ្រឿងម៉ាក ស៊ុយស៊ូគី ស្មាស់រីវ៉ូ ក្នុងល្បឿនលឿនខណៈមកដល់ផ្លូវបែកជាបួនត្រង់ចំណុចស្ដុបកាណាឌីយ៉ា ក៏បុកចំម៉ូតូកង់៣មួយគ្រឿងជិះដោយស្ត្រីម្នាក់លក់ខ្ចៅ បណ្ដាលអោយរងរបួសធ្ងន់២នាក់ស្រាលម្នាក់ ដែលហេតុការណ៍នេះបានកើតឡើងកាលពីវេលា៣និង៤៥នាទីទៀបភ្លឺថ្ងៃទី២ខែមេសាឆ្នាំ២០១៤ ត្រង់ចំណុចផ្លូវព្រះមុនីវង់កែងផ្លូវ១១៤ ស្ថិតក្នុងស្រះចក ខណ្ឌដូនពេញ។
ប្រភពព័ត៌មានពីកន្លែងកើតហេតុបានអោយដឹងថា នៅមុនពេលកើតហេតុគេបានឃើញបុរស២នាក់ស្រវឹងស្រាជោកជាំបានជិះម៉ូតូមួយគ្រឿងម៉ាក ស៊ុយស៊ូគី ស្មាស់រីវ៉ូ ពណ៌ក្រហមលាយខ្មៅ ពាក់ស្លាកលេខ ភ្នំពេញ 1AC-1985 រ៉េពេញផ្លូវតាមបណ្ដោយផ្លូវ១១៤ ទិសដៅពីលិចទៅកើត ខណៈនោះក៏មានម៉ូតូកង់៣មួយគ្រឿងម៉ាកសង់កូរ៉េ ស៊េរីចាស់ ពណ៌ក្រហម ពាក់ស្លាកលេខ ភ2258 ភព១ លក់ខ្ចៅជិះធ្វើដំណើរដោយស្ត្រីម្នាក់ តាមបណ្ដោយផ្លូវព្រះមុនីវង្ស ទិសដៅពីត្បូងទៅជើង ស្រាប់តែមកដល់ចំណុចផ្លូវបែកជាបួនស្ដុបកាណាឌីយ៉ា ម៉ូតស្មាស់រីវ៉ូក៏បានបុកចំម៉ូតូកង់៣ចំពេញទំហឹងបណ្ដាលឱ្យជនរងគ្រោះទាំង៣នាក់ដួលបោកផ្ទប់និងថ្នល់ រងរបួសធ្ងន់បុរសម្នាក់និងស្ដ្រីម្នាក់ ចំណែកបុរសម្នាក់រងរបួសស្រាល។បន្ទាប់ពីកើតហេតុជនរងគ្រោះត្រូវបានរថយន្តសាមុយដឹកបញ្ជូនយកទៅមន្ទីរពេទ្យដើម្បីសង្គ្រោះភ្លាមៗ។
ក្រោយពេលកើតហេតុសមត្ថកិច្ចបានធ្វើការវាស់វែងយកម៉ូតូទាំង២គ្រឿងទៅរក្សាទុកនៅអធិការដ្ឋាននគរបាលខណ្ឌដូនពេញដើម្បីរង់ចាំធ្វើការដោះស្រាយតាមផ្លូវច្បាប់៕
មតិយោបល់