ភ្នំពេញ ៖ នារីរូបស្រស់ម្នាក់បើករថយន្តមិនបើកភ្លើង ពេលបត់មិនស៊ីញ៉ូបណ្ដាលគៀរប៉ះម៉ូតូមួយគ្រឿងជិះដោយបុរស២នាក់ បណ្ដាលអោយដួលបោកនិងថ្នល់របួសបន្តិចបន្តួច តែអ្វីដែលហួសចិត្តគឺនារីរូបស្រស់នេះបានចុះពីរថយន្តហើយនិយាយប្រម៉ាថបុរសរងគ្រោះទាំង២នាក់ថែមទាំងចង់ទារសំណងពីជនរងគ្រោះថែមទៀតផង បង្កអោយមានការចោមរោមមើលពីសំណាក់ប្រជាពលរដ្ឋ កាលពីវេលាម៉ោង១១និង២០នាទីយប់ថ្ងៃទី៧ខែមេសាឆ្នាំ២០១៤ ត្រង់ចំណុចច្រមុះជ្រូករង្វង់មូលវិមានឯករាជ ផ្លូវលេខ៥១កែងផ្លូវព្រះសីហនុ ស្ថិតក្នុងសង្កាត់ចតុមុខ ខណ្ឌដូនពេញ។
ប្រភពព័ត៌មានពីកន្លែងកើតហេតុបានអោយដឹងថា នៅមុនពេលកើតហេតុគេបានឃើញរថយន្តមួយគ្រឿងម៉ាកតូយ៉ូតា កាមរី ពណ៌ស្ករ ពាក់ស្លាកលេខ ភ្នំពេញ 2R-8747 បើកបរដោយនារីរូបស្រស់ម្នាក់បានធ្វើដំណើរពីរង្វង់មូលវិមានឯករាជ ទិសដៅពីកើតទៅលិច ខណៈមកដល់ចំណុចច្រមុះជ្រូក កែងផ្លូវលេខ៥១ រថយន្តក៏បត់ឆ្វេងដោយមិនបានស៊ីញ៉ូប្រាប់ ក៏ប៉ះនិងម៉ូតូមួយគ្រឿងម៉ាកហុងដា វ៉េវអាល់ហ្វា ពណ៌ខ្មៅលាយក្រហម ពាក់ស្លាកលេខ ភ្នំពេញ 1N-6881 ជិះស្របគ្នាបណ្ដាលបុរសទាំង២នាក់ដួលបោកថ្នល់រងរបួសបន្តិចបន្តួច ចំណែករថយន្តរងការខូចខាតដាច់កញ្ចក់ខាងឆ្វេងនិងកូតថ្នាំកំពិតជំហៀងខាងឆ្វេង។
អ្វីដែលប្រជាពលរដ្ឋធ្វើដំណើរឈប់មើលនិងហួសចិត្តនោះ គឺនារីរូបស្រស់នេះបាននិយាយប្រម៉ាថដាក់ជនរងគ្រោះដែលជិះម៉ូតូទាំង២យ៉ាងខ្លាំងៗ ថែមទាំងអោយជនរងគ្រោះទាំង២ចេញថ្លៃសងការខូចខាតរថយន្តរបស់នាងថែមទៀតផង។ បើតាមសាក្សីជាអ្នករត់ម៉ូតូឌុបម្នាក់ដែលបានជិះម៉ូតូពីក្រោយរថយន្ត ឃើញហេតុការណ៍បានប្រាប់អោយដឹងថា រថយន្តនេះបើកបរពេលយប់មិនបើកភ្លើងបំភ្លឺ ថែមទាំងពេលបត់មិនស៊ីញ៉ូថែមទៀត ទើបបង្កអោយមានគ្រោះថ្នាក់បែបនេះ។ បន្ទាប់ពីកើតហេតុសមត្ថកិច្ចមូលដ្ឋានបានចុះមកអន្តរាគមន៍និងទំនាក់ទំនងហៅសមត្ថកិច្ចជំនាញមកធ្វើការវាស់វែងស្ទូចយករថយន្តនិងម៉ូតូយកទៅរក្សាទុកនៅការិយាល័យចរាចរជើងគោលស្នងការដ្ឋាននគរបាលរាជធានីភ្នំពេញដើម្បីដោះស្រាយតាមផ្លូវច្បាប់៕
មតិយោបល់