កាលពីថ្មីៗនេះ គេហទំព័ររបស់អគ្គស្នងការនគរបាលជាតិ បានឲ្យដឹងថា មេដឹកនាំពីរនាក់នៃក្រុមអនាមិកកម្ពុជា ដែលជាសាខារបស់ក្រុមហ៊ែកឃើពិភពលោក ត្រូវបានចាប់ខ្លួននៅខែនេះតាមការចោទប្រកាន់ពីបទជ្រៀតចូលគេហទំព័ររបស់រដ្ឋាភិបាលនិងលួចទិន្នន័យសម្ងាត់ ក្រោយពីអាជ្ញាធរកម្ពុជានិងការិយាល័យសហព័ន្ធស៊ើបអង្កេត FBI របស់សហរដ្ឋអាមេរិកបានធ្វើប្រតិបត្តិការស៊ើបអង្កេតរយៈពេលប្រាំបីខែ។
បើតាមការបញ្ជាក់របស់ លោក ឌីម ចៅសេង មេធាវីតំណាងឲ្យយុវជនទាំងពីរ បានឲ្យដឹងថា ប៊ុន ឃីងមង្គលបញ្ញា និង ជូ សុងហេង ជានិស្សិតឆ្នាំទី៣ នៅវិទ្យាស្ថានស៊ីតិច (SETEC Institute) ត្រូវបានសាលាដំបូងរាជធានីភ្នំពេញបានសាកសួរ និងបានបញ្ជូនខ្លួនពួកគេទៅពន្ធនាគារព្រៃស។
ការចាប់ខ្លួននេះធ្វើឡើងពីរបីថ្ងៃមុនច្បាប់ចម្លងនៃសេចក្ដីព្រាងច្បាប់ស្ដីពីបទល្មើសតាមអ៊ីនធើណិតរបស់កម្ពុជាត្រូវបានចុះផ្សាយតាមអ៊ីនធើណិត។ ច្បាប់នេះដាក់ទោសធ្ងន់ជាងក្រមព្រហ្មទណ្ឌរបស់កម្ពុជាសម្រាប់បទល្មើសស្រដៀងគ្នាពាក់ព័ន្ធនឹងព័ត៌មានវិទ្យា។ តែទោះជាយ៉ាងណា បច្ចុប្បន្នប្រទេសកម្ពុជាគ្មានច្បាប់ប្រឆាំងបទល្មើសតាមអ៊ីនធើណិតទេ។
តើយុវជនទាំងពីរនាក់ខាងលើនេះ មានទោសកម្រិតណា?
មាត្រា៤២៧ មាត្រា៤២៨ និងមាត្រា៤២៩ នៃក្រមព្រហ្មទណ្ឌរបស់កម្ពុជា ពាក់ព័ន្ធនឹងព័ត៌មានវិទ្យា បានចែងថា បទល្មើសនីមួយៗត្រូវពិន័យជាប្រាក់ពី៥០០ដុល្លារទៅ១.០០០ដុល្លារ អមជាមួយនឹងទោសជាប់ពន្ធនាគារចន្លោះពីមួយឆ្នាំទៅពីរឆ្នាំ។
បើតាមការសំដីរបស់លោក Mark Rasch អតីតប្រធានអង្គភាពបទល្មើសកុំព្យូទ័រនៃក្រសួងយុត្តិធម៌របស់សហរដ្ឋអាមេរិកបានឲ្យដឹងថា “ដោយសារតែ [កម្ពុជា] គ្មានច្បាប់ស្ដីពីបទល្មើសតាមអ៊ីនធើណិត គេមិនអាចចោទប្រកាន់ពួកគេទាំងពីរពីបទល្មើសធ្ងន់ធ្ងរជាងនេះបានទេ”។
លោកបានបន្ថែមទៀតថា ទោះបីជាវាអាចទៅរួច ដែលថា រដ្ឋាភិបាលកម្ពុជាបានស្នើសុំឲ្យ FBI ជួយតាមវែកមុខហ៊ែកឃើទាំងនេះក្ដី ក៏មានសេនារីយោមួយច្បាស់ជាងនេះបង្ហាញថា FBI បានរកឃើញព័ត៌មានស្ដីពីក្រុមអនាមិកកម្ពុជា នៅក្នុងការស៊ើបអង្កេតរបស់ខ្លួនលើក្រុមនេះ រួចក៏ផ្ដល់ព័ត៌មាននេះដល់អាជ្ញាធរកម្ពុជា៕
រូបភាព៖ អគ្គស្នងការនគរបាលជាតិ || អត្ថបទដកស្រង់ចេញពីកាសែត ខេមបូឌា ដេលី
មតិយោបល់