កាលពីវេលាម៉ោង ១និង៥០នាទី រំលងអាធ្រាត្រ ឈានចូលថ្ងៃទី៣០ ខែមេសា ឆ្នាំ២០១៤ មានអគ្គីភ័យបានឆាបឆេះឡើយ នៅក្រុមទី៥ ភូមិដើមចាន់ទី១ សង្កាត់ច្បារអំពៅទី២ ខណ្ឌមានជ័យ ដែលបណ្ដាលឲ្យ ផ្ទះធ្វើអំពីឈើ ប្រក់ស័ង្កសី ចំនួន ២០ខ្នង ទំហំ ៤ម៉ែត្រ គុណ៤ម៉ែត្រ និងសិប្បកម្មកែឆ្នៃឈើទំហំ ៨ម៉ែត្រគុណ៣០ម៉ែត្រមួយខ្នង ឆេះទាំងស្រុង ធ្វើឲ្យប្រជាពលរដ្ឋ អាជ្ញាធរភ័យ និងសមត្ថកិច្ច រត់ចែកជើងគ្នា ទាំងកណ្តាលអាធ្រាត្រ ក្នុងការជួយ អន្តរាគមន៍ពន្លត់ភ្លើង ។
យោងតាមសេចក្ដីរាយការណ៍ពីកន្លែងកើតហេតុ បានឲ្យដឹងថា រថយន្ដពន្លត់អគ្គិភ័យ ត្រូវបានបញ្ជូនភ្លាមៗ ទៅកន្លែងកើតហេតុ រួមទាំងការ ជួយអន្ដរាគមន៍ពីសំណាក់អាជ្ញាធរ និងសមត្ថកិច្ចមូលដ្ឋាន ដោយប្រើប្រាស់រថយន្តពន្លត់អគ្គិភ័យ ចំនួន ១២គ្រឿង ស្មើ ៤៤ជើង។ ក្រោយពីមានការអន្តរាគមន៍របស់សមត្ថកិច្ច ពន្លត់អគ្គិភ័យ និងអាជ្ញាធរខណ្ឌមានជ័យ ដឹកនាំដោយ លោកអភិបាលខណ្ឌ គួច ចំរើន មេបញ្ជាបញ្ជាការអាវុធហត្ថខណ្ឌ លោក គិត សុផល និងលោកនេត វត្ថា នាយការិយាល័យពន្លត់អគ្គិភ័យ ភ្លើងបានរលត់ទៅវិញ នៅវេលាម៉ោង ៣ និង១៥នាទីទាបភ្លឺ ។ លោក ទេព បូរ៉ា នាយនគរបាល ប៉ុស្តិ៍ច្បារអំពៅទី២ បានឲ្យដឹងជាជំហានដំបូងថា អគ្គិភ័យនេះ កើតឡើងមកពី ឆ្លងចរន្តអគ្គិសនី ។ លោក នេត វត្ថា បានបញ្ជាក់ថា ម្ចាស់ផ្ទះមានឈ្មោះ សំ សារ៉ន ភេទស្រីអាយុ៥៨ឆ្នាំ មានមុខរបរលក់ពងគ្រូច និងសណ្តែកដីស្ងោ៕
មតិយោបល់