ភ្នំពេញ ៖ បង្គោលភ្លើងមួយដើមបានបាក់សង្កាត់ប៉ះចំរថយន្ត២គ្រឿងចតស្ងៀមរងការខូចខាត ខណៈដែលរថយន្តដឹកសំរាមរបស់ក្រុមហ៊ុនសិនទ្រី បើកបុកចំពេញទំហឹង ដោយសារតែតៃកុងរថយន្តងងុយដេក ដែលហេតុការណ៍នេះបានកើតឡើងកាលពីវេលាម៉ោង៤និង១០នាទីទៀបភ្លឺថ្ងៃទី៩ខែឧសភាឆ្នាំ២០១៤ តាមបណ្ដោយផ្លូវព្រះសីហនុ ស្ថិតក្នុងសង្កាត់បឹងព្រលិត ខណ្ឌ៧មករា។
ប្រភពព័ត៌មានពីកន្លែងកើតហេតុបានអោយដឹងថា គេឃើញរថយន្តដឹកសំរាមមួយគ្រឿងរបស់ក្រុមហ៊ុនសិនទ្រី បើកប្រមូលសំរាមដូចសព្វដង តាមបណ្ដោយផ្លូវព្រះសីហនុ ក្នុងទិសដៅពីកើតទៅលិច ខណៈមកដល់ចំណុចកើតហេតុត្រង់ចំណុចមុខហាងលក់ម៉ូតូយីហោ ហ៊ុយ សាខន ស្រាប់តែរថយន្តក៏រេចង្កូតទៅខាងស្ដាំ ហើយក៏បុកចំបង្គោលភ្លើងបំភ្លឺផ្លូវ មួយដើមបណ្ដាលអោយបាក់សង្កាត់ប៉ះចំរថយន្ត២គ្រឿង មួយគ្រឿងម៉ាកកាមរី និងមួយគ្រឿងម៉ាកលុចស៊ីស ៤៧០ ដែលចតស្ងៀមនៅមុខផ្ទះប្រជាពលរដ្ឋបណ្ដាលអោយរងការខូចខាត ចំណែកតៃកុងរថយន្តបន្ទាប់ពីបង្កហេតុរួចក៏រត់គេចខ្លួនបាត់។ ក្រោយពេលកើតហេតុសមត្ថកិច្ចមូលដ្ឋានបានចុះមកអន្តរាគមន៍និងទំនាក់ទំនងទៅសមត្ថកិច្ចជំនាញចរាចរចុះមកត្រួតពិនិត្យនិងយករថយន្តទៅរក្សាទុកនៅការិយាល័យចរាចរជើងគោកនៃស្នងការដ្ឋាននគរបាលរាជធានីភ្នំពេញដើម្បីធ្វើការដោះស្រាយតាមផ្លូវច្បាប់។
គួរបញ្ជាក់ថា កាលពីវេលាម៉ោង៤និង៥០នាទីទៀបភ្លឺថ្ងៃទី៧ខែឧសភាឆ្នាំ២០១៤ តាមបណ្ដោយផ្លូវបេតុងបុរីសូនី ស្ថិតក្នុងភូមិឫស្ស សង្កាត់ស្ទឹងមានជ័យ ខណ្ឌមានជ័យ ក៏មានករណីស្រដៀងនេះផងដែរបង្កឡើងដោយ រថយន្តដឹកសំរាមរបស់ក្រុមហ៊ុនសិនទ្រី បានបើកបុករបងថ្មដីឡូត៍មួយកន្លែងបណ្ដាលអោយបាក់រងការខូចខាត ដោយសារតែតៃកុងរថយន្តងងុយដេក ។
ប្រភពព័ត៌មានពីកន្លែងកើតហេតុបានអោយដឹងថា គេឃើញរថយន្តដឹកសំរាមមួយគ្រឿងរបស់ក្រុមហ៊ុនសិនទ្រី ជិះធ្វើដំណើរដោយបុរស២នាក់ តាមបណ្ដោយផ្លូវបេតុងបុរីសូនី ក្នុងទិសដៅពីលិចទៅកើត ខណៈមកដល់ចំណុចកើតហេតុរថយន្តក៏រេចង្កូតទៅខាងឆ្វេង ហើយក៏បុកចំរបងថ្មដីឡូត៍មួយកន្លែងបណ្ដាលអោយធ្លាយចូលក្បាលរថយន្តគាល់និងរបង ទៅមុខលែងរួច ចំណែករបងថ្មបានបាក់មួយប្រឡោះធំរងការខូចខាត សំណាងដែលមិនបង្កអោយមានគ្រោះថ្នាក់ដល់អ្នកដ៏ទៃ។ បន្ទាប់ពីកើតហេតុតៃកុងរថយន្តបានរត់គេចខ្លួនបាត់ នៅសល់តែបុរសម្នាក់នៅចាំរថយន្ត។
បើតាមសំដីរបស់បុរសដែលនៅចាំរថយន្តបានអោយដឹងថាមូលហេតុដែលបណ្ដាលអោយរថយន្តបុករបងថ្មបែបនេះគឺដោយសារតៃកុងរថយន្តងងុយដេក ហើយងោកមួយភាំង ក៏បុករបងថ្មតែម្ដង។
ក្រោយពេលកើតហេតុម្ចាស់ដីឡូត៍បានទំនាក់ទំនងទៅដំណាងក្រុមហ៊ុនអោយចុះមកមើលនិងធ្វើការសងសំណងរបងថ្មដល់ម្ចាស់ដីឡូត៍ដើម្បីបញ្ចប់រឿង៕
មតិយោបល់